Miguel Anxo Fernández Lores, candidato do BNG á Alcaldía e actual alcalde de Pontevedra, mantivo este xoves un encontro coa veciñanza de Campañó, no Local Social de Sabarís, acompañado de parte da súa candidatura. 

Lores recordou a importancia que ten o rural dentro do modelo de Pontevedra que defende o BNG e cales son as súas aspiracións se volve a ser reelixido alcalde.

O candidato nacionalista recoñeceu o "orgullo do traballo feito nestes últimos anos" como os núcleos de centralidade parroquial onde se desenvolve a vida social das parroquias, "o traslado dos estándares de calidade de vida da cidade a todos os núcleos residenciais das parroquias garantindo a seguranza viaria e a accesibilidade", a creación dos parques forestais, a chegada do saneamento a todas as parroquias e o abastecemento ao 80% da poboación ou o cambio de iluminación led en todas as parroquias. 

O candidato dixo ainda non estar conforme, xa que aspira a "continuar vertebrando os núcleos residenciais das parroquias" con novas infraestruturas negociadas coa Xunta e co Estado, "aumentando a calidade de vida seguindo solucións xenuínas e adaptadas á realidade de Pontevedra".

Citou como exemplos o caso dos novos núcleos de centralidade de Verducido, Santa María de Xeve ou Campañó na contorna do colexio, a recuperación patrimonial das parroquias como o caso de San Cibrán, en Tomeza, ampliar a rede de locais sociais dotados de equipamentos e actividades, completar a mellora da rede viaria de conexión interparroquial e tamén as vías internas dos núcleos residenciais e afondar na cohesión social de todas e cada unha das parroquias, entre outras moitas "propostas de futuro".