Neste 2020 cumpríronse dez anos dun suceso que conmocionando á sociedade pontevedresa: a desaparición de Sonia Iglesias. Nada se sabe dela desde o 18 de agosto de 2010. Toda unha década de interrogantes que nestes últimos meses tampouco se resolveron.

E se esta incerteza non fose suficiente, a morte de Julio Araújo, ex pareja de Sonia e ata o de agora o único sospeitoso na súa desaparición -pola que foi imputado dúas veces-, supoñerá unha pedra máis no camiño dos investigadores por resolver este caso.

Araújo, que padecía un cancro de pulmón desde facía anos, faleceu o pasado mes de setembro no seu domicilio de Pontevedra. 

Coa súa morte quedan sen resolver moitas das incógnitas que aínda rodean a este caso, arquivado xudicialmente ante a ausencia de avances significativos nos últimos meses.

O último movemento, polo menos publicamente, foi o rastrexo realizado en xaneiro nun pozo e nunha leira de Marcón.

Os investigadores baleiraron o pozo para revisar o seu interior, aínda que a procura resultou infrutuosa e esta vía de traballo tamén se pechou.

Hai apenas un mes, outra novidade sacudiu a contorna de Sonia Iglesias. Aínda que, neste caso, tratouse simplemente dunha cuestión administrativa. A familia da pontevedresa iniciou os trámites para que un xulgado declare oficialmente a súa morte.

Este expediente iníciase tras cumprirse dez anos da súa desaparición, como recolle a lexislación actual. Un avogado presentou esta petición perante o xulgado de primeira instancia número 5 de Pontevedra, en representación do fillo de Sonia Iglesias, xa maior de idade.

O trámite iníciase agora porque a familia de Sonia necesita esa declaración oficial de ausencia para tramitar toda unha serie de procedementos administrativos como a herdanza da muller ou a posible solicitude de orfandade do seu fillo. 

Mentres tanto, a investigación acerca da súa desaparición segue, polo menos aparentemente, en 'stand-by'. Iso si, desde as autoridades reiteran, en cada ocasión na que se lles pregunta, que ningún caso se pecha definitivamente ata resolvelo. Tampouco o de Sonia Iglesias.