Cada vez queda menos para que Pontevedra se converta na auténtica capital mundial do tríatlon co ITU Multisport Festival, que se celebrará entre o 27 de abril e o 4 de maio e que supoñerá a disputa na cidade dos campionatos do mundo de Dúatlon, Acuatlón, Tríatlon Cros, Aquabike e Tríatlon de Longa Distancia.

A organización do evento publicou este xoves os horarios definitivos de todo o evento, con información detallada sobre a recepción de deportistas, adestramentos, carreiras e as diferentes actividades relacionadas co Festival Multideporte.

Está previsto que a competición se inicie o sábado 27 de abril co dúatlon, empezando en horario matinal (desde as 8:00 horas) coa modalidade sprint e as categorías de grupos de idade, mentres que os elite e sub-23 entrarán en acción ás 11:30 da mañá en categoría masculina e ás 13:45 horas na feminina. Xa pola tarde será a quenda do Dúatlon Standard, cos grupos de idade desde as 16:00 horas e a proba 'open' ás 16:45 horas.

O domingo 28 de abril, tras os cambios provocados pola convocatoria de eleccións xerais, só se celebrarán as probas de dúatlon-paratríatlon (9:00 horas) e as carreiras de dúatlon júnior feminina (11:15 horas) e masculina (12:00 horas).

A actividade retomarase o martes 30 de abril co tríatlon cros, empezando pola carreira júnior masculina (13:30 horas) seguida da feminina (13:35 horas) e paratríatlon (13:40), coas carreiras elite masculina ás 15:30 horas e feminina ás 15:35 e os grupos de idade desde as 15:45 horas.

O seguinte día de competición será o xoves día 2 de maio coas probas de acuatlón, comezando coa carreira elite, sub-23 e júnior masculina (15:00 horas), continuando a feminina (15:05), o paratríatlon (15:30) e por últimos os grupos de idade e open (desde 16:00 horas).

Por último o sábado 4 de maio disputarase o tríatlon de longa distancia, no que competirán figuras locais como Pablo Dapena, Gómez Noya e Saleta Castro, e o aquabike. A longa distancia dará a saída ben cedo, ás 8:00 horas coa proba masculina e ás 8:05 coa feminina, co paratríatlon ás 8:10 e os grupos de idade desde as 8:25 horas. En canto ao aquabike, as carreiras partirán ás 9:15, 9:20 e 9:30 horas.

Consulta aquí todos os horarios detallados do ITU Multisport Festival de Pontevedra 2019.