No xa lonxíncuo pasado,
na cocinha que custodia
o fume que foxe irado
polas fendas do telhado
nesta hora tan serodia.
Arredor do avó Peón
escoitamos con devoción
cento e unha parodia
Que armoniosa dicción !
Que doce e sabia prosodia !
Así entre grolos de vinho,
entre un conto e outro continho,
sentimos ruído na horta
e escoitamos, Xesusinho !...
...que alguén batía na porta.
Dixo o avó, " Pró que raio
quere hoxe este espantalho ??
Faime o favor Manoela:
bótalhe unha codela
E que vaia pró caralho ! "
Alí, da noite ó abrigo
oímos tralo postigo
recitar tristes monodias
e intemporais salmodias
en gregoriano antigo.
Cando abriu a tía avoa,
asomou unha caveira,
danzando no ar lixeira,
e dixo ela: " Vaiche boa,
hoxe vés moi brincadeira ! "
" Toma e come a fartar
que hoxe non hai antipodia;
sen gorxa para tragar,
nin ano con que excretar,
non precisas centinodia ".
E o espectro, ás chanchadas,
cazaba no aire as codias
batendo forte as queixadas,
acompasando as trabadas
cas notas dunha rapsodia.
" É o que ten este esperpento;
ou a queres, ou a odias.
Non é trasno medonhento,
só un esquelete famento
esta " CAVEIRA DAS CODIAS "
( Baseado nun conto de Xosé Peón Peón, poeta enxebre que xa hai que fai parte da TERRA que tanto amou )
RETÉN CELESTIAL PERPÉTUO.
Turno de garda
A estancia é dun brancor absoluto. Paredes, solo e teito mixtúranse nun totum impolutum sen cabo nin comezo. No centro, unha mesa branca sustenta un portátil todo branco agás a mazá- logo da tampa. Unha presunta funcionaria de dentadura almafí, nívea túnica e ebúrneo e curto pelo, manipula o ordeador e leva, nun lateral da cabeza, un sistema micro- audífono "sen mans". Na sua face sobrancean, como o único non branco, uns expléndidos olhos augamarina.
Na estancia pululan uns seres presuntamente masculinos envolvidos en túnicas, por suposto, brancas. Estes entes invirten o tempo en pasear, conversar, xogar, escribir, ler ou, simplemente, sonear. De vez en cando, algún deles interpreta unha peza nun piano branco coma o de Elton John. As súas teclas negras, e agás algúns olhos, son o único negro deste inmaculado "mundo raro". E todo flúe de vagar cando se escoita a voz (feminina ?) da presunta funcionaria:
- Preséntense Gabriel, Cañamel, Utiel, Gargamel, Sonytel, Cuartel, Penafiel e Churumbel -os amentados vanse achegando e sitúanse a ambos lados da mesa.
- Pasen por recepción a recolher as asas e preséntense na Maternidade da Residencia de Belvitge no Baix Llobregat…
- Pero…todos ? -preguntou un deles.
- Si, todos. Debe de ser cousa da lúa que está a nacer moita criatura de "nuestro" señor -soltoulhes ela, por toda explicación.
Aínda ben non saen, a hipotética funcionaria volve chamar por invisibles alfofalantes:
- Manuel, Bordel, Gardel, Dintel, Ariel mailos hirmáns Hotel, Motel e Hostel, pasen por recepción a recolher as asas mailas intruccións.
- E non seremos moitos ? -deixou caer un deles.
- E máis que se precisan. A cousa é para a China.
Naquel intre chega un con cara de poucos amigos. Ela preguntoulhe:
- Ei chacho!…que pasou entón ?
- Onte cumpriu 18 e o pai mercoulhe un carro.
- E…?
- Non leveba o cinto posto.
- Vaites hó!…Atención Furriel, Appel, Chanel, Carabanchel, Dosel, Nivel, Babel, Caritel…
- Mimadrinha ! é unha guerra ? -quixo saber un.
- Si, con miles de violacións.
Logo de marcharen os devanditos chegou un, tristeiro. Ela preguntoulhe:
- Pero se ti aínda saiches onte! Que pasou ?
- Morte prematura. Virus desconhecido ou cousa así.
- Xá…, prepárense Rafael, Yosoyaquel, Fidel, Arancel, Granel, Cordel, Clavel, Gel…Pasen por recepción a recolher as asas mailas instrucións.
- E estes…? Preguntou o de sempre.
- Baby boom en África. Por desgraza pronto estarán de volta…por certo; aí vén unha manchea deles -dirixíndose ós recén chegados- Que é o que pasou ? -un deles respondeu- Pregúntalhe a Netanyahu.
- E como vai por Siria ? - saltou ela. Outro díxolhe:
- Non sei. Eu venho da Ucraína.
A secretaria seguiu co seu rutineiro trabalho…
-Atención Espinel, Corcel, Eiffel, Coctel, Bedel (pero este non ía para presidente da federación ?)Hidromel, Pinrel, e Teruel (que tamén existe), Troquel, Chuchamel, Babel e Marcel (pero non Marceau). Estes van para a India que tampouco se queda atrás trebelhando…E ese xentío que aí vén…?
-Operación retorno, maiormente da nacional III -informou un.
- Xa, pois que pasen onde os outros e que lhes dean a cartilla de licenciados. A ver: que se preparen Miguel, Daniel, Esparabel, Desnivel, Trisquel, Asrael, Borrel, Seodurgel, Carpanel, Bechamel, Courel e Jinguelbel…Uf! ; o choio de Anxo da Garda évos ben estresante hó…