Precisamos oasis.
-Alguén que, a día de hoxe, decide abrir un novo medio de comunicación!!??
-Iso é imposible.
Non, non o é. Pero, normal que a fazaña esperte signos de interrogación, de exclamación e de admiración. No deserto dos medios de comunicación onde día si, día tamén, pecha un xornal, despiden traballadores de xeito masivo, ponse en marcha un ERE ou reducen medios de produción, atopamos este pequeno oasis que nos ofrece un pouco de frescura, de ilusión e, por que non, de esperanza.
Nace PontevedraViva coa cidade e a información como folla de ruta e con grandes doses de traballo e de valentía como motor. Non o neguemos, hai que ser moi aguerrido para lanzarse neste momento a crear unha empresa, canto máis se esta é de información. Se cadra é máis doado abrir un banco.
Por todo isto, porque estamos sedentos de olladas novas, porque Pontevedra vai ter un oco máis onde reflectirse, porque precisamos ilusións, proxectos e valentíasdebemos implicarnos con eles e tenderlles agora a nosa cantimplora para que emprendan viaxe. Porque, si, vánnola devolver máis chea do que estaba.