O Campionato de España de Pesca Submarina, por primeira vez en Sanxenxo
Por Redacción
Sanxenxo será sede a próxima fin de semana, por primeira vez, do Campionato de España de Pesca Submarina.
A cita, na que competirán 47 deportistas de once comunidades, disputarase durante o sábado 17 e domingo 18 de xuño de 9.00 a 14.00 horas en dúas zonas, entre Punta Festiñanzo-Punta Faxilda e entre Punta Faxilda-Illote Pombeiro.
Os participantes levan xa días estudando os fondos mariños destas zonas. Todo para un campionato no que se premiará o número de especies diferentes, a cantidade e o peso, e haberá un tope de capturas por especie fixada na competición. Todas as capturas realizaranse con pesca selectiva e serán doadas a bancos de alimentos.
Así o explicaron na presentación do evento o secretario do Club Sotavento, Héctor Costa, e o concelleiro de Deportes de Sanxenxo, Daniel Arosa.
O campionato contará con categoría feminina e masculina reunindo a destacados nomes da pesca submarina como Jacobo García, veciño de Aios e cinco veces campión galego; o andaluz David Montero, os asturianos Antonio Linares e Santiago López, a balear Magdalena Sart, a vasca Yaiza Romero, a cántabra Almudena Calvo ou as galegas Sandra Osorio, Isabel Arroio, Soraya Hermida e Belén Díaz.