A ex número 1 mundial Caroline Wozniacki, primeiro escollo de Lourdes Domínguez en Australia
Por Diego Espiño
Difícil cruzamento para Lourdes Domínguez no primeiro Grand Slam do ano, o Aberto de Australia cuxa fase final arranca o próximo luns 13 de xaneiro en Melbourne.
A tenista pontevedresa quedou emparellada na primeira rolda do cadro individual feminino coa ex-número 1 do Mundo Caroline Wozniacki.
Lourdes, que comparece en Australia como 72 do ranking, nunca se enfrontou na súa carreira á danesa, e cruzaríase en caso de gañar á vencedora do partido entre Christin McHale e Yung-Jan Chan.
Antes do Aberto Wozniacki, actual número 10 da clasificación WTA, non xogou ningún partido oficial, mentres Domínguez chega ao torneo tras caer en primeiro rolda de Auckland ante a sueca Johanna Larsson (7-5 e 6-0).
Polo momento só se realizou o sorteo dos cadros individuais, quedando para a próxima semana a configuración dos emparellamentos de dobres.