O Arxil recibe aos portugueses do Olivais de Coimbra no XX Torneo Cidade de Pontevedra
Por Alejandro Espiño
O ano deportivo pontevedrés comeza con baloncesto. O pavillón universitario acollerá esta fin de semana a vixésima edición do Torneo Cidade de Pontevedra, organizado polo Club Baloncesto Arxil. O seu rival nesta ocasión será o equipo portugués do Olivais de Coimbra, cuxo primeiro equipo milita na primeira división do baloncesto feminino do país veciño.
O torneo Cidade de Pontevedra consistirá nun total de oito partidos nos que competirán, en modalidade de ida e volta, as distintas categorías de infantil, cadete, junior e senior de ambos equipos. O Arxil xa adiantou que, nas categorías de base, aliñará equipos distintos para dar participación ao máximo número de xogadoras. "Temos moitas rapazas de esas idades e queremos que todas teñan a oportunidade de xogar", sinalou Mayte Méndez.
Os partidos comezan o sábado. Cruzaranse as diferentes formacións dende as 16.00 horas ata as 20.15 horas, na que se enfrontarán os equipos senior. Ao día seguinte, domingo, no mesmo escenario do Pavillón Universitario enfrontaranse os equipos infantil e cadete. Ao mesmo tempo, no Estadio da Xuventude (CGTD), competirán os equipos junior e senior do Arxil e o Olivais. Os partidos, nesta xornada de domingo, comezarán ás 10.00 e 12.00 horas.
Na presentación do torneo, que tivo lugar este venres no Concello de Pontevedra, o edil de Deportes, Agustín Fernández, sinalou que o deporte feminino, como factor de igualdade, constitúe unha das principais liñas de actuación do seu departamento. E neste sentido recordou que o próximo mes de xuño Pontevedra acollerá o Campionato de España infantil de baloncesto feminino.
Pola súa banda, a adestradora do Arxil, Mayte Méndez, mostrou o seu desexo de darlle ao Cidade de Pontevedra "a relevancia que merece" e avanzou que se traballará para recuperar o formato de torneo triangular, no que poidan participar equipos da máxima categoría do baloncesto feminino español. Un proxecto que polo de agora é "imposible", ao contar só co apoio do Concello de Pontevedra.