Voluntarios, servizos, infraestruturas... o que non se ve dos mundiais de loita de Pontevedra
Por Diego Espiño & Mónica Patxot
Os campionatos do Mundo de loita que acolle estes días Pontevedra supoñen un reto maiúsculo a nivel organizativo, pero nada que asuste a unha cidade afeita xa ao que supoñen os grandes eventos deportivos.
Non en balde trátase do "evento de loita máis importante da nosa historia", recoñeceu antes da súa inauguración o director técnico dos campionatos, Pablo Pintos, en algo só comparable no seu deporte ao vivido nos Xogos Olímpicos de Barcelona.
Desde o pasado día 12, cando comezou a competición de grappling para as categorías sub-17, sub-20 e absoluta, e ata o vindeiro domingo 23 de outubro cando conclúa o Mundial Sub-23 de Loitas Olímpicas, son máis de 1.100 os deportistas que pasarán pola Boa Vila procedentes de 70 países de todo o planeta.
Para atendelos e que non se escape ningún detalle ao redor de 40 persoas traballan de maneira directa a diario no Pavillón Municipal dos Deportes e o resto de instalacións postas ao dispor dos mundiais, pero non son os únicos porque a eles súmanse un importante número de voluntarios e colaboradores das federacións Galega e Española.
Toda persoa relacionada coa loita olímpica en Pontevedra achega o seu gran de area, desde deportistas de base pasando por adestradores ou por un referente como a local Lydia Pérez, internacional absoluta e que non dubida en desprazarse a un aeroporto para recoller a unha delegación ou a axudar en calquera outra cuestión.
Desde o persoal do Servizo Municipal de Deportes e as federacións pasando pola xente de seguridade, médicos, prensa, fotografía, staff técnico, administrativos ou unha trintena de alumnos en prácticas da Facultade de Ciencias da Saúde e do Deporte... Todo suma para conseguir que os mundiais de Pontevedra sexan un éxito.
A actividade de feito comeza ben cedo cada mañá, coa pesada dos deportistas no Recinto Feiral a partir das 8.00 horas. Trasládase despois á zona de quecemento, cunha carpa instalada na parte traseira do Municipal, sen descoidar a zona de cátering tamén no Recinto na que os deportistas e delegacións recuperan enerxías sen ter que perder tempo en traslados.
Tamén niso está moi pendente a organización, e é que ademais dos hoteis pontevedreses son moitos os deportistas que se aloxan ata en cinco hoteis de Sanxenxo e aos que atenden a cada momento, sen decuidar os recibimentos e traslados aos aeroportos de Vigo, Santiago de Compostela e ata ao de Sá Carneiro en Porto.
Un actividade que non se apaga a diario ata pasadas as 21.00 horas da noite, cando terminan as entregas de medallas da xornada. Moitas horas de esforzo pero cunha gran satisfacción, a de ver a Pontevedra colocada no mapa do deporte mundial.
Relacionadas:
-
Recepción municipal á Selección Feminina de Loita U15, concentrada en Pontevedra
Por Redacción |
-
Pontevedra clausura os mundiais de loitas despois de quince intensos días
Por Redacción & Cristina Saiz |
-
Nerea Pampín queda sen opcións de bronce ao ceder na repesca do Mundial Sub-23
Por Diego Espiño & Mónica Patxot |
-
Yui Susaki, un ciclón deportivo que inscribiu a Pontevedra nos libros de historia da loita mundial
Por Diego Espiño |
-
Nerea Pampín, á repesca no Mundial Sub-23 de Loita
Por Diego Espiño |
-
A loita feminina entra en escena no Campionato do Mundo Sub-23
Por Diego Espiño & Mónica Patxot |
-
Pontevedra inaugura o Mundial Sub23 de Loita mirando cara ao futuro: "Agardamos acoller algún Europeo absoluto"
Por Diego Espiño & Mónica Patxot |
-
España pecha o Mundial de grappling e grappling-gi con 44 medallas
Por Redacción |
-
Choiva de medallas para España nas primeiras xornadas dos mundiais de loita
Por Manu Otero |
-
Yui Susaki, unha campioa olímpica e mundial que busca en Pontevedra o 'Grand Slam' da loita
Por Diego Espiño |
-
Nove mundiais, setenta países e 1.100 deportistas para "o evento de loita máis importante da nosa historia"
Por Manu Otero & Mónica Patxot |
-
Pontevedra, preparada para ser sede da loita mundial durante as próximas dúas semanas
Por Redacción |