A Volta a Galicia parte este ano desde Poio nunha homenaxe a Magín Froiz
Por Manu Otero
A Volta a Galicia de ciclismo, que se celebrará entre o 15 e o 18 de setembro, partirá desde Poio nunha homenaxe ao falecido Magín Froiz polo seu valioso labor na promoción e apoio ao deporte da bicicleta.
Na presentación do evento, o vicepresidente segundo da Xunta, Diego Calvo, recordou ao fundador do grupo alimenticio Distribucións Froiz como un "pioneiro que traballou de xeito incansable polo benestar galego desde a economía ata o deporte apoiando e patrocinando diferentes eventos deportivos". Neste sentido, fixo fincapé no impulso que supuxo para o ciclismo galego a "creación en 1987 xunto a Evaristo Portela do Grupo Deportivo Supermercados Froiz con grandes logros na categoría elite e sub-23. En concreto, na Volta Ciclista a Galicia acadou a vitoria ata en sete ocasións", destacou.
A vixésima edición da Volta a Galicia constará de catro etapas, percorrerá 600 quilómetros da xeografía galega e terá saídas desde os Concellos de Poio, Taboada, Manzaneda e Ponteareas. Trátase dunha carreira de gran tradición, de categoría elite e sub 23, que ten na súa palmarés a gañadores ilustres como Delio Fernández, Miguel Induráin, Frank Vandenbroucke ou Andrew Hampsten.
Na edición deste ano competirán 18 equipos, dos que dez son galegos: Cidade de Lugo, Cortizo, Drone Hopper, Farto, Grupo Deportivo Supermercados Froiz, Lasal Louriña, Oiense, Retelec Alca, Rías Baixas e CC Vigués.
O percorrido das catro etapas será presentado nos próximos días, pero a primeira etapa, con saída desde Poio, inclúe o paso polos concellos de Meaño, Cuntis, Pontecesures, Catoira ou Ribadumia. Na segunda, o pelotón cruzará Taboada, Monterroso, Portomarín, Sarria, Bóveda, A Pobra do Brollón, Monforte de Lemos e Chantada. Mentres que a terceira parte desde Manzaneda para pasar pola Pobra de Trives, A Rúa, Vilamartín de Valdeorras, O Barco de Valdeorras e A Veiga. A carreira decidirase na cuarta e última etapa con saída desde Ponteareas e paso polos municipios das Neves, Fornelos de Montes, Mondariz e Mondariz-Balneario.
Relacionadas:
-
Multan á organización da Volta Ciclista a Galicia por cortar antes de tempo o acceso cara ao Mosteiro de Poio
Por Diego Espiño |
-
Alexander White leva en Poio unha emotiva primeira etapa da Volta Galicia con homenaxe a Magín Froiz
Por Diego Espiño |
-
Así afectará o tráfico a primeira etapa da Volta ciclista a Galicia con inicio e final en Poio
Por Redacción |
-
O Concello de Poio aproba o plan de disposición de fondos
Por Redacción |
-
O ciclismo galego rende homenaxe a Magín Froiz, "unha persoa irrepetible"
Por Alejandro Espiño & Cristina Saiz |
-
Poio nomeará a Magín Froiz como fillo adoptivo do municipio
Por Oskar Viéitez |
-
Profundo pesar na sociedade polo "baleiro insustituible" que deixa Magín Froiz
Por Alejandro Espiño |
-
O ciclismo pontevedrés, de loito polo falecemento de Magín Froiz: "Déixanos un gran baleiro"
Por Diego Espiño |
-
Falece Magín Froiz aos 78 anos
Por Anxo Lourido & Alejandro Espiño & Mónica Patxot | Creada e actualizada