O Comercial Durán mantén a cuarta praza tras a súa axustada vitoria (3-2) ante o CV Bruxas
Por Redacción
Sufrida vitoria do Comercial Durán na sétima xornada da Segunda División feminina. Visitaba o Multiusos da Xunqueira un equipo, a priori, cómodo para as pontevedresas. Pero o Club Voleibol Bruxas demostrou que non hai rival pequeno. Estivo a piques de dar a sorpresa ao caer por 3-2 fronte ao equipo da cidade do Lérez.
Tras tres sets de alternancias nos que ambos conxuntos repartiron o dominio do xogo (25-20, 21-25 e 25-16), o Bruxas lograba forzar o tie break sendo máis decisivo no parcial máis axustado do encontro (23-25), pero non soubo manter o ritmo nun quinto set que levaron comodamente as pontevedresas por 15 tantos a 7.
Con esta vitoria, o Comercial Durán mantense na cuarta praza da clasificación. Supéranlle o Caldaria Voleyourense, o Calasancias Coruña e o Galitrans Viaxes Embaixador, novo líder da categoría con 19 puntos, seis máis que as pontevedresas.
NOVA DERROTA MASCULINA
Na Segunda División masculina, vitoria do Ames sobre o Comercial Durán, noutro axustado partido que sen embargo foi resolto en tres sets. A igualdade de forzas fíxose patente nun primeiro set que rebasou a barreira dos vintecinco puntos e foi a parar a mans dos santiagueses por 24 a 26.
A derrota non amilanou aos de Pontevedra que seguiron loitando no segundo e tan só cederon nos intres finais por 22 a 25. Esta situación repetiríase no terceiro no que os amaenses volvían a resultar máis efectivos nos puntos finais, adxudicándose a vitoria por 23 a 25.