Os socios do Arosa deberán pasar polo despacho de billetes para poder presenciar en directo na Lomba un dos partidos máis esperados da tempada, a visita dun histórico como a Sociedade Deportiva Compostela, actual cuarto clasificado.

A directiva arlequinada decidiu declarar o choque do próximo domingo 5 de decembro (17.00 horas) como medio día de axuda ao club.

Desta forma os abonados arosistas deberán pagar 10 euros na bancada de Tribuna e 7 euros en Preferencia e os fondos, mentres que os seguidores sub-15 non terán suplemento.

No que respecta ao público xeral as entradas fixáronse en 20 euros en Tribuna, 15 euros en Preferencia e fondos e 5 euros para os menores de 15 anos.

O Arosa confirmou ademais que antes do partido ante o Compostela renderá homenaxe ao ciclista vilagarcián Gustavo César Veloso, que decidiu retirarse tras unha longa traxectoria no pelotón profesional.