Iván Feijoo, Lara Lois e Saúl López reteñen os seus títulos galegos de XCO en Marín
Por Redacción
O Xaxanbike organizado a fin de semana pola Escola Irene Trabazo XSM Clube Ciclista acolleu os campionatos galegos de BTT na modalidade de Cros Country Olímpico (XCO).
O sub-23 Iván Feijoo (BH Templo), a elite Lara Lois (Extol MTB Team) e o elite Saúl López (Academia Postal-Abanca) revalidaron os títulos autonómicos que conseguiron en xullo de 2019, cumprindo os prognósticos que os situaban como favoritos.
Preto de 200 ciclistas participaron no campionato celebrado en Marín nun circuíto curto e técnico que se endureceu polas choivas dos últimos días.
Tanto na carreira elite-sub23 feminina como na masculina os gañadores abriron oco na volta inicial. Entre as mulleres, Lara Lois impuxo un ritmo que ningunha dos seus rivais puido seguir para conquistar a súa terceira coroa consecutiva. A grovense venceu cun tempo de 1 hora 12 minutos e 20 segundos seguida de Diana Blanco (Bicicletas Chinquena) e Aida García (Team Farto), segunda e terceira respectivamente.
En canto á proba masculina, Iván Feijoo impuxo o seu golpe de pedal desde o inicio para terminar impoñéndose cun tempo de 1:22:05 e case un minuto de vantaxe sobre Saúl López (Louriña), segundo, e máis de dous minutos sobre o terceiro, Brais Sendín (Louriña).
Ademais dos campionatos galegos Marín completou a xornada coa Mini BTT Xaxanbike congregando a máis de 400 nenas e nenos.