Galicia, lista para os Xogos Paralímpicos de Tokyo con Juan Saavedra como unha das súas principais bazas
Por Redacción
Tokyo 2021 será quinta experiencia de Juan Saavedra nuns Xogos Paralímpicos.
O seu palmarés atesoura unha medalla de prata en Londres 2012 e diplomas en Atenas 2004 (4º) e Sidney 2000 (8º). Ademais o tirador foi o primeiro deportista español en certificar o seu billete para a cita xaponesa, alá por setembro de 2018.
Agora o pontevedrés é unha das mellores bazas galegas para os inminentes Xogos, e como tal foi un dos protagonistas da presentación dos 21 deportistas galegos presleccionados para Tokyo.
"Necesitamos seguir traballando e preparándonos. Estamos a vivir o día a día co obxectivo posto en Tokyo. Esperamos que todo vaia a mellor e que a situación pandémica vaia remitindo", explicou Saavedra nun acto celebrado en Vigo presidido polo secretario xeral para o deporte, José Ramón Lete, e vicepresidente primeiro do Comité Paralímpico Español, Alberto Durán.
Tamén tomou a palabra a triatleta viguesa Susana Rodríguez, recoñecendo que "o meu obxectivo é ser sempre unha mellor triatleta e despois de Río, aspiro a chegar a Tokio con forza. Confío en poder facer ese dobrete nos Xogos, aínda que aínda hai cousas por decidir".
Os Xogos Paralímpicos de Tokyo celebraranse entre o 24 de agosto e o 5 de setembro.