O Cisne cede o seu extremo Jose Leiras ao Torrelavega ata final de tempada
Por Manu Otero
O Dicsa Modular Cisne fixo oficial este xoves a cesión de José Leiras ao Balonmán Torrelavega de División de Honra Prata ata final de tempada.
O extremo dereito, que leva cinco anos na disciplina do conxunto branco, non contou con demasiadas oportunidades nas últimas semanas pola irrupción dos canteiráns Carlos Álvarez e Mateo Arias, pola chegada de Anxo Iglesias e pola presenza doutros xogadores do primeiro equipo como Javier Vázquez ou Pablo Picallo que gozan de máis confianza por parte do técnico.
Deste xeito, o xogador poderá dispoñer de máis minutos nunha categoría menos esixente que a liga Asobal e nun dos equipos que está inmerso na pelexa polo ascenso á máxima categoría do balonmán nacional. A final de tempada, o extremo regresará a Pontevedra para negociar o seu futuro coa entidade lerezana.
Leiras non estará xa dispoñible para Jabato para o partido deste venres. O Cisne visita o Palau Blaugrana para medirse a un rival intratable, o FC Barcelona, líder destacado da competición. Sen opcións de vitoria, os brancos tratarán de ofrecer a mellor imaxe posible, evitar lesións e aproveitar o encontro para traballar aspectos tácticos e competitivos para próximos duelos máis igualados.
O encontro está fixado para a tarde do venres ás 19.30 horas e a expedición pontevedresa está composta por: Álex Chan, Pablo Picallo, Álvaro Preciado, Miguel Simón, Jorge Villamarín, Javier Vázquez, Iván Calvo, Carlos Pombo, Pablo Gayoso, Gonzalo Carró, Daniel Ramos, Pablo González, Alejandro Conde, Olek Nekrushets e Ángel Iglesias.
Relacionadas:
-
O Atlético Valladolid visita o Municipal na primeira das seis finais que lle restan ao Cisne
Por Redacción |
-
Pequeno respiro para un Cisne que aspira a dar guerra no tramo final da tempada
Por Diego Espiño |
-
A precipitación e fraxilidade defensiva privan ao Cisne de loitar pola vitoria (26-34)
Por Manu Otero & Mónica Patxot |
-
Andrés Sánchez, do Cisne, operado con éxito da súa rotura de ligamento cruzado
Por Manu Otero |
-
O Cisne ponse ao día nunha nova final pola permanencia
Por Manu Otero |
-
O Cisne rexorde das súas cinzas para superar con fartura o Guadalajara (29-25)
Por Almu Dapena & Cristina Saiz |