Benidorm, rival do Teucro en primeira rolda da Copa do Rei de Balonmán
Por Diego Espiño
O sorteo da primeira rolda da Copa do Rei de Balonmán, celebrado na mañá do xoves na Federación Española de Balonmán, deparou un cruzamento entre Servigroup Benidorm e Sociedad Deportiva Teucro.
A eliminatoria, fixada para o fin de semana de 19 e 20 de outubro, xogarase a partido único na cancha do equipo alicantino.
Fóra da valoración deportiva, no seo do club azul non sentou ben o resultado do bombo, pois se pretendía evitar un desprazamento longo, como finalmente sucedeu.
A primeira rolda da competición, con cruzamentos entre os equipos da División de Honra Prata, quedou configurada do seguinte xeito: Bordils-Octavio; Chapela- Pozoblanco; Amenabar-Barcelona B; Zamora-Sinfin; Antequera-Alcobendas; Ereintza-Palma del Río e Barakaldo-Torrelavega.
PRESENTACIÿN DOS ADESTRADORES DA BASE
O club azul aproveitou ademais a xornada para presentar o organigrama técnico de todos os equipos da entidade, nos que adestran preto de 300 nenos entre as categorías inferiores e as escolas deportivas, ademais do recén recuperado equipo sénior feminino.
Baixo a coordinación de Toño Puga e Luis Montes, os técnicos da base teucrista para a presente tempada son: Anxo Otero, Sergio Carballeira, Alberto Posada, Juan Noya, Adrián Méndez, Rafael Carballeira, Laura del Castillo, Fernando Sanmartín, María Longueira, Francisco Domato, Luis Domínguez, Andrea Mouriño, Felipe Lorenzo, Ana Silva e Manuel Montes.