É un dos poucos retos que lle faltan por conseguir ao Supermercados Froiz, por iso cada ano figura na súa lista de competicións prioritarias.

O conxunto alimenticio vela armas para o seu inminente debut nunha nova edición da Copa de España Elite e Sub-23 de ciclismo en estrada, un certame que tras o aprazamento das súas primeiras citas ten previsto arrincar este domingo 14 de marzo coa XVII Aiztondo Klasika-Memorial Patxi Alkorta no País Vasco.

Por diante 11 probas puntuables ata o 11 de xullo, na que o G.P de Primavera Ontur pechará o calendario.

Na Aiztondo Klasika, con 146 quilómetros, participarán 25 equipos e 175 ciclistas cun esixente percorrido polo val de Aiztondo onde se sucederán subidas a Larraitz (4,4km. ao 4,6%), Altzo (2,2 km. ao 7,1%), Alkiza (4,4 km. ao 5,7%), Aduna (0,8 km. ao 8,1%) ou Zizurkil (1km. ao 10,2%).

Defenderán ao Froiz nesta carreira: Nicolás Antorena, Pablo Alonso, Diego Martín Lázaro, Santiago Cadavid, Juan Diego Cano, Ramón Fernández e Miguel Mera.

Será só a segunda carreira na tempada para un Froiz que aspira este curso para manterse entre os mellores equipos do pelotón nacional.