Javi Gómez Noya celebra o seu título mundial de tríatlon cun novo triunfo, esta vez na China
Por Alejandro Espiño
Seis días despois de proclamarse por terceira vez campión das Series Mundiais de Triatlón, Javi Gómez Noya volveu a subirse todo o máis alto do podio. De Londres a Pekín. Na capital chinesa, volveu a demostrar o gran momento de forma que atravesa. A proba, á que se accedía por invitación, está organizada como forma de popularizar o tríatlon na China.
Esta vez sen os irmáns Brownlee en acción, Javi Gómez Noya dominou a proba desde o segmento de natación. Saíu primeiro da auga con 20 segundos de vantaxe sobre o estadounidense Brian Fleischmann. Pero nos 40 quilómetros sobre a bicicleta saíulle un duro rival, o australiano Greg Bennett, que lle deu caza e ata lle superou antes de comezar o terceiro sector.
Pero non houbo maior problema. O altísimo ritmo que Gómez Noya impuxo na carreira a pé foi imposible de soportar para Bennett. A partir de aí, foi todo un monólogo do atleta afincado en Pontevedra. Tanto que concluíu cunha vantaxe de 1:38 sobre o australiano. O estadounidense Brian Fleischmann foi terceiro.
"Sentinme moi ben a pesar do pouco tempo que pasou desde Londres e da viaxe. Xa contaba con saír do auga na cabeza, e ao ser só alcanzado por Bennet durante o ciclismo tiven fácil a terceira fase", dixo Javi Gómez Noya ao remate da proba.
O outro español participante no triatlón pequinés, Mario Mola, clasificouse en sexta posición, o mesmo posto que logrou a española Carolina Routier na categoría feminina.
O atleta galego volverá competir a próxima fin de semana no Grand Prix de Niza.