A dificultade de viaxar a competir a Canarias en tempos de covid, segundo a experiencia do Arxil
Por Redacción
A pandemia complica, e moito, o día a día da maioría de equipos que compiten en categoría nacional, e máis se como o Club Baloncesto Arxil deben viaxar fóra da península, no seu caso a Canarias.
O conxunto pontevedrés afrontou a última fin de semana unha dobre xornada nas Illas, a primeira para recuperar un duelo aprazado no seu día polo virus e que supuxo un importante quebranto económico ao ter que dobrar o gasto previsto. De feito axustouse o calendario para xogar o encontro coincidindo co outro desprazamento a Canarias da tempada.
De regreso a Pontevedra, agora a entidade arxilista relata as súas 'aventuras' e os inconvenientes que tivo que superar para cumprir cos seus compromisos na Liga Feminina 2 en plena pandemia.
En concreto o Arxil puxo rumbo a Canarias o pasado xoves pola tarde vía aérea, voando con escala en Madrid e comprobando como "o avión estaba completo no seu aforo, sen distancias de seguridade ou pasaxeiros quitando a máscara", relata o club.
Unha vez en Tenerife colleron a súa última combinación a Lanzarote. Esperaba o Magec Tías nun pavillón no que tiveron que cambiarse utilizando un almacén e no que non puideron ducharse, tendo que regresar ao hotel para iso e aínda por encima tras encaixar unha dolorosa derrota.
De volta a Tenerife co que non contaba a expedición pontevedresa é cun tempo de choiva e vento, máis propio de casa que das Illas. Polo menos no seu segundo encontro, na matinal do domingo, conseguían un triunfo reparador fronte ao Adareva.
Aínda faltaba a viaxe de volta no seu particular maratón, con voo ata Madrid e traslado por estrada en dúas furgonetas ata Pontevedra, atravesando choiva e neve para chegar ás 6.00 horas do luns a casa. Toda unha pequena odisea.
Relacionadas:
-
Sara Castro lidera a vitoria do Arxil sobre o Azkoitia Azpeitia (73-67)
Por Almu Dapena & Cristina Saiz |
-
Esixente cita para o Arxil no CGTD fronte o Azkoitia Azpeitia
Por Redacción |
-
A base do Arxil retoma a súa actividade
Por Redacción |
-
O Arxil reencóntrase coa vitoria á conta dun Adareva que llo puxo difícil (68-70)
Por Almu Dapena |
-
A falta de acerto condena ao Arxil ante o último clasificado, o Maget Tías (70-64)
Por Almu Dapena |
-
Dobre cita clave para o Arxil en Canarias
Por Redacción |