O Pontevedra afronta sen Churre unha "gran final" para manterse na loita pola Primeira RFEF
Por Manu Otero
En can fraco todo son pulgas, di un refrán que ben pode aplicárselle ao Pontevedra nas últimas semanas. O conxunto granate recibe este sábado ás 17 horas ao Zamora, segundo clasificado, cunha nova baixa pola lesión. Churre sufriu unha pequena rotura no isquio dunha das súas pernas que o terá parado durante as dúas próximas semanas.
Pasarón acollerá mañá "unha gran final" para os de Ramos, obrigados a sumar os tres puntos para reengancharse á pelexa por un dos tres primeiros postos da táboa que garanten o pase, a próxima tempada, á Primeira RFEF. "A verdade que estamos a ser un pouco pesados dicindo que todos os partidos eran finais case desde principio de tempada por como está deseñada a competición, pero si, esta vez é unha gran final e temos a sorte de xogala en Pasarón e hai que gañar", sostén con determinación o adestrador do Pontevedra.
Dada a mala dinámica e as dúbidas que rodean ao equipo, non sería desatinado crer que xogar sen a presión dunha afección tan esixente como a granate podería favorecer ao equipo. Algo que Jesús nega taxantemente. "Queremos público", subliña o adestrador que estraña o apoio dos "3.000 ou 4.000 fieis" que acudían regularmente a Pasarón antes da pandemia. Quéixase tamén Ramos por unha regulación desigual que permite a equipos como o Zamora dar acubillo a 1.500 afeccionados no encontro de ida e que en Pasarón o aforo estivese sempre limitado a un máximo de 500 persoas.
Nin a falta de público, nin a serie de lesións, nin a mala sorte serven de escusa no vestiario de Pasarón. En oito días, o Pontevedra xogará tres partidos que poden situalo de novo nos postos altos da táboa ou dar practicamente por fracasada a tempada. Pon como exemplo o técnico marinense ao Compostela, que foi capaz de enlazar dúas vitorias consecutivas e escalar á zona nobre da clasificación. "Pero temos que gañar estes tres partidos", insiste.
E terá que facelo sen Adrián Cruz, que aínda non toca balón e non se espera o seu regreso ás convocatorias ata finais de mes; nin Churre, caído esta semana. "Desde que se lesionou Romay foron caendo xogadores, ben por lesións, por sancións ou por casos covid. Primeiro afectounos ao centro do campo, daquela a dianteira e agora os centrais. Non tivemos sorte", lamenta o preparador sen querer empregar esta circunstancia como escusa.
A deusa Fortuna leva tamén parte de culpa na falta de puntos das seis últimas xornadas. "O equipo está a merecer gañar", sostén Ramos. "Ás veces o traballo non sempre dá vitorias, fainos falta un chisco de sorte", engade.
Sen ela terao moi complicado o Pontevedra para dobregar a un dos equipos máis en forma da competición. Recentemente ascendido a Segunda B, o Zamora marcha en segunda posición cun estilo de xogo sólido e un equipo moi cohesionado que lle serviu para sumar puntos ante rivais chamados a estar moi por encima dos casteláns na táboa. "Xa en Terceira tiña xogadores moi bos para Segunda B, levan 2 ou 3 anos traballando da mesma forma e iso nótase", encomia o técnico granate.
A súa capacidade para combinar en fase ofensiva con Hernández e o exgranate Carlos Ramos como principais referentes en ataque é unha das grandes preocupacións do corpo técnico granate, que tampouco se despista do seu perigo a balón parado ou a súa férrea defensa posicional. Con todo, confía Jesús en que o Pontevedra saiba atacar os puntos débiles do Zamora, un equipo que sofre sen balón e débil na transición defensiva, para conseguir a vitoria.
Só lle serve a vitoria ao Pontevedra este sábado. Jesús Ramos sábeo, o seu futuro no banco depende en gran medida de lograr os tres puntos. "Só estou preocupado porque o equipo traballa, ten moita actitude e segue mellorando, pero non se gaña. Iso é o que nos amola", recoñece o técnico coa esperanza de que o enfrontamento contra o Zamora supoña un punto de inflexión.
Relacionadas:
-
Jesús Ramos tras a derrota ante o Zamora: "Hay que hacer algo más para ganar los partidos sino es imposible"
Por Almu Dapena |
-
Interminable caída libre do Pontevedra, superado polo Zamora e a piques de dicir adeus á meta do ascenso (0-1)
Por Manu Otero & Cristina Saiz |
-
Toda a tempada en xogo en 8 días de infarto
Por Diego Espiño |
-
Pitu, un xogador de banda "vertical" que ve o Pontevedra "un equipo grande"
Por Diego Espiño & Mónica Patxot |
-
O Pontevedra deixa escapar o triunfo ante o Celta B no último suspiro e permanece na UCI (1-1)
Por Manu Otero |
-
Barreiro, onde todo empezou para Jesús Ramos
Por Diego Espiño |