Gómez Noya, campión das Series Mundiais tras vencer nun apertado final en Londres
Por Diego Espiño
Tíñao todo en contra. A pesar da súa gran tempada Javier Gómez Noya necesitaba gañar a final das Series Mundiais en Londres para superar a Jonathan Brownlee e o que parecía máis difícil, que o outro irmán británico, Alistair, finalizase como mínimo terceiro.
Pero Alistair, despois de gañar os seus últimos dez triatlóns en distancia olímpica, acusou problemas físicos no tramo final a pé e Gómez Noya aproveitou a situación, nun apertado sprint final, para bater o outro Brownlee, ao pequeno, e na súa casa para alzarse co seu terceiro título mundial.
Desbordou emoción unha proba que tiña como escenario o mesmo circuíto dos Xogos Olímpicos, con moito público ao longo de todo o percorrido, e que viu como os dous ídolos locais tomaban vantaxe sobre o seu principal rival no primeiro sector, o de natación, pero Gómez Noya, que saíu da auga en décimo terceiro lugar, logrou recuperar na transición o tempo perdido para meterse no grupo de cabeza.
Un grupo de 13 triatletas formou entón o grupo cabeceiro no ciclismo, cunha marxe sobre os seus perseguidores, entre os que estaba o español Mario Mola, que se aumentou ao longo dos 40 quilómetros ata chegar de novo á transición con 30 segundos de vantaxe.
Ao comezar a carreira a pé Alistair Brownlee evidenciou os seus problemas e descolgouse da cabeza, deixando a proba e o título nun man a man entre o galego e o pequeno dos Brownlee.
A pesar dos intentos de Noya por descolgar o seu rival, as Series Mundiais decidíronse nun emocionante sprint final e por un só segundo en favor do galego.
Mario Mola completou o podio tras unha grande remontada no tramo final, mentres Alistair Brownlee chegou a meta no posto 52.
Relacionadas:
-
Pontevedra brinda polos seus campións mundiais
Por Diego Espiño |
-
Javi Gómez Noya sobre o Mundial de Dúatlon: "Mi intención sigue siendo participar en Pontevedra, sea en la fecha que sea"
Por Diego Espiño |
-
Javi Gómez Noya celebra o seu título mundial de tríatlon cun novo triunfo, esta vez na China
Por Alejandro Espiño |
-
A ITU fai coincidir en 2014 a proba das World Series en Londres co Mundial de Dúatlon de Pontevedra
Por Diego Espiño |
-
Gómez Noya, segundo en Estocolmo tras Alistair Brownlee cede o liderado das Series Mundiais
Por Alejandro Espiño |