A tempada número 33 do Grupo Deportivo Supermercados Froiz no pelotón nacional elite e sub-23 traerá consigo moitos cambios.

O conxunto alimenticio atópase en plena planificación do próximo curso, e no seu plantel só terán cabida catro corredores que defendían a súa camisola este 2020.

Estas catro renovacións son as de Iván Martínez, Jorge Suárez, Ramón Fernández e o arxentino Nicolás Antorena.

"Son corredores con ganas de seguir dándoo todo neste deporte e con proxección sobre todo por parte de Ramón, Jorge e Nicolás", explica o equipo pontevedrés. Pola súa banda do veterano Iván Martínez o Froiz espera que "ensine aos mais mozos a moverse dentro do pelotón".

A estes nomes hai que sumarlles o do santiagués Miguel Ángel Mera, procedente do MMR Academy de categoría júnior.

Desta forma do plantel da escuadra alimenticia caen homes importantes como o pontevedrés Guillermo García Janeiro, Adrián Barros ou o actual campión de España, Samuel Blanco, que xa confirmara o seu paso ao profesionalismo en Portugal.