Gómez Noya revalida o seu título no prestixioso Hy-Vee 5i50 Triathlon de Estados Unidos
Por Redacción
Javier Gómez Noya defendeu e revalidou este domingo o título no Hy-Vee 5 i 50 Triathlon de Des Moines, en Iowa (Estados Unidos) un premio que o triatleta xa gañara en 2012.
Gómez Noya cruzou a liña de meta cun tempo de 1:45:57 e conseguiu o premio de 110.000 dólares deste campionato, o de maior contía económica da disciplina.
Segundo informa Triatlon Channel, o triatleta comezou a proba imparable, foi o primeiro en saír da auga. A proba ciclista cambiou a clasificación e o ferrolano asentado en Pontevedra perdeu 1:20 minutos. Na carreira a pé recuperou a súa posición e mantívose entre os escapados durante a metade do percorrido.
Gómez Noya chegou finalmente en primeira posición con 12 segundos de vantaxe sobre o seu principal rival, o americano Hunter Kemper. Na auga investiu 17:17 no sector de natación; sobre a bicicleta, 55:36; e na carreira a pé, 30:30.
Co premio debaixo do brazo regresará xa a Pontevedra para seguir preparando a súa participación na Gran Final das Series Mundiais de Londres. Será o 15 de setembro e volverase enfrontar aos irmáns Brownlee, que non competiron en Des Moines.