O Poio Pescamar non iniciará a liga de Primeira División de fútbol sala feminino na data prevista, o vindeiro sábado 17 de outubro.

O motivo é o positivo por covid-19 dunha futbolista do que ía ser o seu rival na primeira xornada, o CD Leganés.

Tras detectar o caso o conxunto madrileño puxo a situación en coñecemento das autoridades sanitarias e da Real Federación Española de Fútbol, ademais de paralizar os adestramentos do equipo.

Poucas horas despois de facer pública a situación, o encontro correspondente á primeira xornada que debía disputarse na localidade madrileña foi oficialmente aprazado, pasando a fixarse nunha das fins de semana que quedan libres tras a recomposición do calendario coa división da categoría en dous grupos.

Desta forma, como pronto, o choque entre Leganés e Poio Pescamar non se poderá xogar ata finais do mes de decembro.

"Por sorte, tanto a xogadora como o resto de equipo atópanse en perfecto estado e desexando volver canto antes aos adestramentos", sinalou o cadro madrileño sobre o estado do seu plantel.

COMUNICADO OFICIAL| Se ha producido un caso positivo por COVID-19 en una de las integrantes de la plantilla del @CDLeganesFS_Fem. Por suerte, tanto la jugadora como el resto de equipo se encuentran en perfecto estado y deseando volver cuanto antes a los entrenamientos.#VamosLega pic.twitter.com/zyCFgb9nY1

— C.D. Leganés Fútbol Sala Femenino (@CDLeganesFS_Fem) October 11, 2020

Tras a suspensión da súa primeira xornada, o Poio Pescamar céntrase xa no seu seguinte compromiso, o que salvo contratempo enfrontaralle o 24 de outubro na casa ao Roldán na segunda xornada de liga.