Tiveron que pasar máis de seis meses para poder volver vivir un partido do Poio Pescamar, aínda que se tratase dun amigable.

Por fin o conxunto vermello, vestido nesta ocasión de azul, puido saltar á pista no seu primeiro encontro amigable da pretempada, recibindo na Seca ao actual campión de liga, o Pescados Rubén Burela.

Un rival de altura para o primeiro test, e o equipo adestrado por Manu Cossío superouno con nota deixando boas sensacións a dúas semanas do inicio dunha tempada na que queren aspirar a todo.

O Burela golpeou primeiro, cun tanto de Dany aos 8 minutos de xogo. E puido ser peor, porque as locais puxéronse moi pronto con cinco faltas cedendo pouco despois un dobre penalti que non aproveitou Elena.

O Poio Pescamar soubo aguantar eses momentos e xusto despois Luci conseguía o empate marcando desta forma ao seu ex-equipo. Non quedou aí a cousa e Ana Rivera pouco antes do descanso remontaba o duelo ao poñer o 2-1 no marcador.

Xa no segundo acto, o Poio foi capaz de defenderse ante as acometidas das visitantes, que buscaban a igualada. De novo estiveron preto desde o dobre penalti que estrelaron no pau, ao cargarse rápido de faltas o conxunto vermello, pero aínda que non o lograron nese instantes si acertaron desde os 10 metros no minuto 38, por medio de Cristina Pérez.

Tiveron na seguinte acción a ocasión as locais de levar o triunfo, tamén cun dobre penalti, pero evitouno a gardameta lucense cunha boa intervención.

Ao final empate que debe servir ás de Manu Cossío para crecer en sensacións de cara ao cada vez máis próximo inicio da tempada oficial. 

Pantalla completa