Primeira lesión grave no Pontevedra: Tomás será intervido de rotura do menisco esquerdo
Por Ramiro Espiño
Pronto chegou o primeiro contratempo serio para o Pontevedra. O mozo Tomás causará baixa por espazo non inferior a tres meses, ao ter que pasar polo quirófano para ser intervido dunha rotura do menisco do seu xeonllo esquerdo. A lesión produciuse nos últimos minutos do amigable que os granates disputaron no Monte Da Vila fronte ao Unión Grove. O propio xogador confirmábao a PontevedraViva durante o adestramento que os seus compañeiros realizaron no campo de Zacande: "Al hacer un giro noté que me quedaba clavada la pierna, sintiendo enseguida el dolor en la rodilla".
Despois das oportunas exploracións, tras confirmar a lesión, os servizos médicos do Pontevedra, encabezados polo doutor Alberto Domínguez, decidiron operar o xogador, que será intervido o luns ou martes da próxima semana. Tomás tomábao con optimismo: "Siempre es un fastidio, pero mejor que ocurra ahora que en mitad de la temporada. Espero estar recuperado lo antes posible".
ADESTRAMENTO EN ZACANDE
Mentres Tomás se mantiña a marxe, nunha banda, acompañado de Javi Nogueira, que sofre unha distensión muscular que lle impediu adestrar, o resto do equipo adestrou no campo de Zacande, en Meis. Nando quixo así preparar o debut ligueiro fronte ao Choco nun escenario de herba sintética, similar ao que se van encontrar o domingo en Soutomaior.
O susto da tarde deuno Fran Fandiño, que nun salto con Javi Otero recibiu unha cabezada involuntaria do seu compañeiro, causándolle unha dobre brecha na parte interior do labio. Inmediatamente foi atendido pola fisiterapeuta, Nerea Videira, para frear a aparatosa hemorraxia que lle causou, se ben non tivo transcendencia e tras uns minutos na banda puido reincorporarse ao adestramento.
Quen estivo ausente do ensaio foi Santi Domínguez, ao que novamente motivos laborais lle impediron adestrarse cos seus compañeiros.
Os granates repetirán adestramento en Zacande na tarde do venres para poñer fin á preparación do partido, posto que o técnico decidiu dar descanso aos seus homes o sábado.