Samuel Blanco, ciclista do Supermercados Froiz, proclamouse este domingo campión de España elite en Jaén tras 190 quilómetros ao ritmo dos profesionais cun media de 42 km/h.

Desde o inicio de carreira producíronse cortes e fugas pero sen chegar a coller tempo como para ver perigar nalgún momento o Campionato. Os corredores do Movistar, Caja Rural, Euskaltel Euskadi e Kern Pharma encargáronse de que se botasen abaixo producindo moitos cortes na parte traseira do pelotón polo alto ritmo.

A falta de 60 quilómetros a meta a carreira poñíase moi interesante quedando un grupo duns 40 corredores entre os que ían os corredores do Froiz, Samuel Blanco e Iván Martinez. Houbo un corte de catro corredores profesionais entre os que se introduciu Samuel pero o Euskaltel botou abaixo esa fuga. Na ultima volta foi cando se tensou a carreira quedando un grupo na cabeza de 20 corredores entre os que persistía o propio Blanco xunto dous amateur máis sendo o resto profesionais.

Houbo un ataque a falta de 8 km a meta de Vicente de Mateos (Louletano) e de Fernando Barceló (Cofidis) para preparar a chegada para o seu compañeiro Jesus Herrada quen atacou a falta de 4 quilómetros a meta. Astana con Izaguirre, e Luís León Sanchez, respondían o ataque mentres o do Froiz seguía mantendo o seu gran rendemento a roda dos mellores profesionais.

Por diante gañaría finalmente o segundo do Astana, pasando a Herrada no ultimo quilómetro e medio, mentres Blanco aproveitaba este alto ritmo para facer o seu final a un altísimo nivel chegando en solitario en categoría elite á linea de meta podendo alzar os brazos para celebrar a vitoria máis importante da súa carreira e conseguindo un noveno posto na clasificación profesional a 32 segundos de Luís León Sánchez.