Mayte Méndez, adestradora do Arxil, no partido ante o Avilés no CGTD

O Arxil formaliza a súa inscrición en Liga Feminina 2 e cumprirá 20 anos na categoría

Por Redacción
Luns 13 de Xullo, 2020 ás 16:55 do Luns 13 de Xullo, 2020

O Club Baloncesto Arxil cumpriu coa súa parte e estará a todos os efectos a próxima tempada na Liga Feminina 2, cumprindo 20 anos na segunda categoría do baloncesto feminino nacional.

O conxunto pontevedrés, a pesar da incerteza económica provocada pola situación sanitaria e que afectou á maioría de clubs en maior ou menor grao, formalizou este luns a súa inscrición en LF2 tras cumprir cos requisitos esixidos pola Federación Española de Baloncesto (FEB).

En concreto a entidade arxilista entregou o aval solicitado de 13.500 euros, ademais de asumir os 2.000 euros fixados como custo de inscrición. Todo iso sen espremer o prazo que tiña para iso, e que finalizaba ás 13:00 horas do próximo venres 17 de xullo.

Asegurado o seu futuro, todos os esforzos centraranse agora na confección dun plantel no que actualmente hai tres xogadoras confirmadas, as renovadas Natalia López e Cristina Díaz-Pache e a fichada Noelia Masiá.

O reto, asegura o Arxil, será "conformar un plantel versátil e de calidade pero primando o bloque destas últimas tempadas".

Mentres tanto a entidade pontevedresa celebrou as súas dúas décadas en Liga Feminina 2 cun vídeo con imaxes recentes do club.