Preto de 350 xogadores participan durante a fin de semana en Silgar no XV Torneo de Balonmán Praia
Por Redacción
O XV Torneo de Balonmán Praia Sanxenxo HIGOBA celébrase esta fin de semana no areal de Silgar por décimo quinta edición consecutiva e contará con preto de 350 xogadores vidos de todos os puntos de Galicia e o norte de España.
O campionato, o máis importante e de maior tradición de toda Galicia na súa categoria, disputarase ao longo de toda a xornada do sábado e a tarde do domingo, en tres pistas de xogo simultáneas, con partidos divididos en dous tempos independentes de 10 minutos de duración cada un e que, en caso de empate, deberá decidirse por un 'gol de ouro'.
Os equipos dividiranse en grupos de 5 e da súa clasificación dependerán os cruzamentos da xornada do domingo, co obxectivo de adxudicarse o trofeo Hotel Carlos I en categoría masculina e o trofeo La Caixa en categoría feminina, que serán vales de compra na tenda especializada balonmán.com, un ano máis colaboradores indispensables e aos cales os organizadores queren agradecer o seu apoio.
Os participantes de todas as categorías a nivel nacional de balonmán (Liga Asobal, ABF, Division de Honor Plata e 1º Nacional) en categoría masculina e feminina, xogarán contra xogadores afeccionados e ex-xogadores que tratarán de poñerllo difícil e onde as sorpresas a bo seguro estarán á orde do dia, con goles e paradas espectaculares ademais de 'flys' e xogo dinámico, que farán as delicias dun público que un ano máis abarrotará o paseo da praia de Silgar.