Lloves acepta a oferta islandesa e abandona o Pontevedra
Por Ramiro Espiño
Sergio Lloves vaise. O porteiro do Pontevedra decidiu aceptar finalmente a oferta do ÿlafsvik Vikingur, equipo da Primeira División de Islandia, anticipada por PontevedraViva, e tras dialogar na mañá do venres con Milo Abelleira alcanzou un acordo para rescindir o contrato que lle ligaba co club granate.
A marcha de Lloves significou un pequeno beneficio para o Pontevedra, xa que para obter a súa baixa o porteiro condonou a débeda que o club mantiña con el, correspondente ás mensualidades pendentes da pasada tempada.
O porteiro, que fai apenas unhas semanas renovaba o seu compromiso co conxunto pontevedrés, vaise a Islandia e deixa o Pontevedra na obriga de buscalo un substituto. Recordemos que, pendente da resposta de Lorenzo á oferta de renovación á baixa que lle cursara o director deportivo granate, a portaría do equipo que adestrará Nando queda unicamente co gardameta Edu Sousa, procedente do filial, que de súpeto pasa de ser o terceiro porteiro a contar con serias posibilidades de botarse ás súas costas a responsabilidade de defender a portaría do primeiro equipo.
O Pontevedra negocia con Paco, do Somozas, como substituto de Lloves
Tras confirmarse a baixa, Milo Abelleira púxose a traballar para buscar un substituto de garantías, especialmente ante a dúbida da continuidade de Lorenzo, e de feito nas próximas horas podería anunciarse o substituto de Lloves. Aínda Que oficialmente nada se confirmou, o obxectivo do Pontevedra é Francisco Fernández Pernas, coñecido futbolísticamente como Paco, porteiro de 25 anos, 1,87 de estatura, formado no Rácing de Ferrol, en cuxo primeiro equipo estivo catro tempadas, e que a pasada tempada defendeu as cores do Somozas.