Mauricio vaise 'a medias' e Nino Mirón, Monbús e Sercoysa frustran, polo momento, as intencións de Lupe Murillo
Por Ramiro Espiño
Xogando ao despiste. Así comezou unha tarde intensa na que se intentou debuxar o futuro inmediato do Pontevedra C.F., pero que rematou sen acordo definitivo e unicamente solucións temporais que non conseguiron o beneplácito da maioría accionarial da entidade granate.
Como anticipara PontevedraViva, a reunión convocada estaba previsto que se realizase no Pazo Provincial. Non obstante, ao saír á luz a noticia, a última hora algún dos asistentes parece que intentou eludir o seguimento informativo, trasladando o lugar da cita ao Parador de Turismo, curiosamente o mesmo lugar no que naceron os famosos 'Pactos do Parador' que remataron con Mauricio Rodríguez na presidencia do Consello de Administración.
Deste modo, como querendo xogar ao escondedoiro cos medios, pero sen conseguilo, tivo lugar o que poderiamos chamar como segunda edición dos famosos pactos, aínda que neste caso con resultado ben distinto, xa que non se chegou ao pretendido acordo que pasaba por un respaldo total e incondicional á figura de Lupe Murillo como sucesora de Mauricio Rodríguez na cadeira de brazos presidencial, mantendo o mesmo Mauricio como membro do Consello e piar fundamental no equipo da propia Murillo.
Na reunión déronse cita o presidente da Deputación Provincial, Rafael Louzán, o alcalde pontevedrés, Miguel Anxo Fernández Lores, ademais de Mauricio Rodríguez e José Manuel Fernández, presidente e vicepresidente do Pontevedra. Xunto a eles sentáronse á mesa Lupe Murillo, e sete dos accionistas propietarios de importantes paquetes accionariais, ben en persoa, como Nino Mirón e Ricardo Tilve, ou representados, casos de Sercoysa, Monbús, Construcións Crespo, Frama e Sogal.
José Manuel Fernández asume a presidencia en funcións, Lupe Murillo entra como conselleira e Mauricio mantense no consello
Se ben nun principio se intentaba eludir o seguimento dos medios de comunicación, ao comprobar a nosa presenza permitiuse o acceso á sala onde se celebraba a reunión para obter constancia gráfica desta. Logo, á saída, tras máis de hora e media de reunión, quen falou foi Ricardo Tilve para indicar: "Acordamos que ata o día 25 que remata o prazo de ampliación de capital isto vai continuar igual. Lupe entra como conselleira, José Manuel será presidente en funcións e entón tomarase unha decisión. Veremos se ela se presenta presidente ou non, xa veremos, pero hai posibilidades de que si o faga. De momento díxonos algo importante e é que ela sabe que lle vai custar diñeiro. Ten o apoio de Deputación e Concello e o meu ao cen por cen".
A pesar do anterior, Ricardo Tilve recoñecía que Lupe Murillo pode non contar co apoio dalgúns dos principais accionistas: "Posiblemente si, pode que algún dos accionistas máis grandes non lle apoien, pero hai que esperar. Mauricio deixa a presidencia. Descoñezo se despois vai continuar ou non".
Nino Mirón, Sercoysa e Monbús opuxéronse a dar visto e prace a un proxecto que pretende manter ao club en Terceira División tres anos máis
Pero tras a aparencia de normalidade e cordialidade que se intentou transmitir, o desacordo no seo dos asistentes quedou patente ao non conseguir a aprobación, como se pretendía nun principio, da candidatura da mesma Lupe Murillo, nese mesmo acto. De feito, segundo puido saber PontevedraViva, polo menos tres dos grandes accionistas, Nino Mirón, Sercoysa e Monbús, opuxéronse ao seu nomeamento sen condicións, esixindo coñecer antes o seu proxecto de futuro para o club e os nomes das persoas que lle acompañarían no consello, especialmente tras o que poderiamos cualificar como auténtico despropósito cara á afección e masa social do club, xa que sobre a mesa se deixou caer que para que o club sexa viable deberá permanecer polo menos outras tres tempadas en Terceira División.
Ante semellante pretensión, os tres accionistas que suman entre eles máis do 50% do capital social, esixiron non sólamente coñecer en profundidade a folla de ruta de Lupe Murillo e o seu probable equipo, senón tamén que anunciaron a súa disposición a escoitar calquera outro candidato que intente conseguir as rendas da entidade.
Dese modo concluíu a primeira reunión da tarde, que non conseguiu o pretendido acordo que, de confirmarse esas intencións de mantelo tres anos máis en Terza por parte dos aspirantes a dirixir ao club, podería supoñer a puntilla definitiva para o Pontevedra C.F., e de moi dificil xustificación ante a súa masa social que non entendería unha decisión tan disparatada.
Seguidamente os membros do consello trasladáronse ás oficinas do club, en Pasarón, para dar conta o resto dos membros do consello do acontecido antes e formalizar os acordos alcanzados. Dese modo Lupe Murillo pasa de asesora a conselleira, José Manuel Fernández asume a presidencia en funcións, polo menos ata o 25 de xullo e Mauricio Rodríguez deixa a cadeira de brazos presidencial pero aférrase ao cargo manténdose como conselleiro.