Ascensos con sabor granate; Javi Gracia á afección pontevedresa: "Gracias por ayudarme a llegar a Primera"
Por Ramiro Espiño
Xuño de 2002. Pasarón era respectuosa testemuña do ascenso a Segunda División da U.D. Almería. Os afeccionados granates vivían a primeira das súas fases de ascenso na etapa de Nino Mirón como presidente. Un inimigo común, o Real Madrid B, conseguira que o sentimento pontevedrés, tras perder as opcións propias, se decantase do lado andaluz. E o Almería ascendeu entre o xúbilo e agradecemento dos seus afeccionados desprazados ata Pontevedra.
Dende entón, as dúas afeccións gárdanse certo cariño, a pesar da distancia xeográfica e de categoría que lles separan. Os dous equipos seguiron camiños ben dispares, pero a relación sentimental estreitou máis se cabe tras a fichaxe polo club almeriense de tres persoas con pasado granate e cuxo paso polo Pontevedra deixou unha pegada imborrable.
Con Javi Gracia ao mando técnico, o seu axudante Juan Solla como preparador físico, e Charles como máximo goleador da categoría, a Almería conseguiu o retorno a Primeira división o pasado fin de semana e moitos foron os pontevedreses que inundaron as redes sociais de mensaxes de felicitación a todos eles.
A tempada de Charles foi de escándalo. 27 goles, máis outros 5 nos partidos de play-off, que lle sitúan como segundo máximo goleador histórico da categoría de prata, só superado polo ex-xogador do Celta, o tamén brasileiro Baltazar. 32 goles que lle levan a primeira división, aínda que todo apunta a que non será nas filas almerienses, senón a unha volta a Galicia, de confirmarse a súa fichaxe polo R.C. Celta de Vigo, que saltou á luz na mañá do luns.
Pero se Charles tivo sempre moi presente o Pontevedra, dende a súa marcha do conxunto granate, a festa de celebración do ascenso non impediu que o seu adestrador, Javi Gracia, quixese ter un recordo moi especial para o club que lle permitiu dar os seus primeiros pasos como técnico profesional, asi como para os afeccionados granates.
Javi Gracia: "Me acuerdo con mucha pena de no haber conseguido el ascenso en Pontevedra. Gracias por ayudarme a llegar a Primera. Espero ver pronto mejor al Pontevedriña"
Así, o técnico navarro respondeu á felicitación que lle enviamos poucas horas despois de conseguir o ascenso, tras a vitoria fronte ao Girona, cunha mensaxe na que quixo poñer de manifesto o seu agradecemento a Pontevedra e á súa afección, ao escribirnos: "Diles a todos que me acuerdo con mucha pena de no haber conseguido el ascenso allí. Gracias por ayudarme a llegar a Primera. Espero ver pronto mejor al Pontevedriña".
Palabras que deixan ben claro o gran cariño que Javi Gracia mantén cara a un Pontevedra que baixo as súas ordes ilusionaba e rozou o ascenso a Segunda División, cun equipo como o da foto que acompaña a este artigo, e na que podemos ver a: Luciano, Bonís, Ígor, Vázquez, Yuri, Baggio (de pé), Charles, Nasser, Machado, Víctor Ormazábal e Organista (de pé), e no que tamén estaban outros xogadores como Fran Rico, Sáizar, Asier Ormazábal, Juan Jesús ou Azparren.
Por certo que naquel equipo hai xogadores que tamén este ano conseguiron ascensos de categoría, como é o caso de Luciano, que nas filas do Alavés regresou a Segunda División, onde lle esperan ex-compañeiros como Sáizar e Yuri, máximo goleador esta tempada da Ponferradina. En Primeira segue, por suposto, Fran Rico, que con Charles e Diego Castro completan a nómina de ex-granates na máxima categoría.
Sen dúbida, eran mellores tempos para o Pontevedra, C.F.