O Tenis de Mesa Monte Porreiro dá a talla nos campionatos autonómicos
Por Redacción
Bo papel o protagonizado polo Tenis de Mesa Monte Porreiro nos Campionatos Galegos Alevín e Sub-23 celebrados durante a fin de semana na localidade coruñesa de Narón.
Nos seus resultados destacou o papel da moza dupla do equipo de División de Honra, Noa Bernárdez (16 anos) e Noelia Santiago (17), que asinaron un triplete ao proclamarse campioas autonómicas por equipos, dobres e individual na categoría Sub-23.
En toda a fin de semana Noa Bernárdez chegou a disputar ata 16 partidos individuais e 7 dobres sen perder nin un só enfrontamento.
Pola súa banda, na categoría Sub-23 masculina, o equipo formado por Martín Quinana, Crístofer Santiago e Carlos Casal foi subcampión, alcanzando ademais Crístofer Santiago e Carlos Casal o terceiro posto na modalidade de dobres.
Xa en idade alevín, no apartado feminino o equipo formado por Laura Forte, Mariña García e Natalia Oubiña alcanzou en subcampeonato, Mariña García e Laura Forte quedaron subcampioas en dobres e Laura Forte finalizou en terceira posición en categoría individual, mentres que os mozos alcanzaron o quinto posto co equipo formado por Iván Acuña, Fabián Cancela, Hugo González e Daniel Baena.