A Liga Nacional de bádminton desembarca en Pontevedra co Ravachol apurando as súas opcións de ascenso
Por Diego Espiño
O pavillón da Cidade Infantil de Príncipe Felipe será escenario a próxima fin de semana, os días 2 e 3 de febreiro, das tres últimas xornadas de competición na Liga Nacional de Bádminton de Primeira División.
Faio ademais co club local, o Ravachol Pontevedra, apurando as súas opcións de pelexar polo ascenso á máxima categoría.
O conxunto pontevedrés debe gañar os seus tres enfrontamentos da fin de semana e esperar que os seus dous principais rivais, entre os que se atopa o Torrejón contra o que se enfrontarán na tarde do sábado, cedan en dous partidos. Así chegarían á segunda praza que dá acceso ao play-off.
"É o evento máis grande dos que temos organizado", sinalou na súa presentación Jesús Pereiro, adestrador do Bádminton Ravachol Pontevedra, acompañado da concelleira de Deportes, á espera do Campionato de España Sub-11 e Absoluto que terá lugar na Boa Vila en maio.
En total daranse cita en Príncipe Felipe 16 equipos con algo preto de 200 deportistas.
A actividade iniciarase o sábado ás 11:00 horas, con xornada de mañá e de tarde, e continuará o domingo a partir das 10:00 horas. Todo iso con entrada de balde para o público.