Pontevedra, protagonista no calendario nacional de piragüismo para 2019
Por Diego Espiño
Un ano máis Pontevedra será unha das sedes principais do piragüismo nacional, acollendo grandes competicións tanto nas instalacións da pista David Cal- Pontillón do Castro, en Verducido, como no tramo urbano do río Lérez.
Así o establece o calendario provisional da Real Federación Española de Piragüismo para o ano 2019, concedendo a Pontevedra a organización dun bo número de eventos de primeiro nivel.
No Pontillón do Castro abrirá fogo o 18 e 19 de maio unha proba da Copa de España de Sprint Olímpico, nunha tempada clave para os deportistas ao repartirse os primeiros billetes para Tokyo 2020. Ademais ese mesmo mes disputarase, os días 25 e 26, o Campionato de España de Novas Promesas Cadete sobre a distancia de 1.000 metros.
Tamén en Verducido o 8 e 9 de xuño está previsto un torneo da Primeira División tanto masculina como feminina, mentres que os días 26 e 27 será a quenda do Campionato de España Sprint de Novas Promesas Cadete e Infantil.
Pola súa banda o río Lérez volverá gozar da elite do piragüismo-maratón nacional co Campionato de España previsto para os días 17 e 18 de agosto, e onde os primeiros espadas deberán buscar a súa clasificación para as grandes citas internacionais.
Por último, na Boa Vila terá lugar o Campionato de España de Longa Distancia na modalidade de Barco Dragón, previsto para os días 7 e 8 de setembro.