Paso adiante do Club Ciclista Farto co seu equipo feminino
Por Redacción
No seu segundo ano de vida, o proxecto do Club Ciclista Farto para o seu equipo feminino bota andar coa mirada posta no profesionalismo.
A escuadra pontevedresa quere converterse no primeiro conxunto profesional feminino de Galicia, baixo a dirección técnica de Marcos Serrano e Luís Méndez.
Para iso o Aleata-Farto reforzouse ata configurar un plantel de 21 corredoras, entre as que se atopan as principais expoñentes do ciclismo autonómico, deportistas doutras comunidades e mesmo do estranxeiro, como a arxentina Antonella Núñez, a portuguesa Elisabete Lopes ou a súa última fichaxe, a campioa de Venezuela júnior María Daza.
O resto de integrantes do equipo son: Ana Rodríguez, Andrea Tomé, Antía Crende, Cristina Bru, Diana Pedrosa, Ester Rubio, Fanny Avellaneda, Inés Nascimento, Jenifer Pontes, Joana Cortico, Katiuska García, Laia Conesa, Lorena Sanín, María Pilar, María Correa, Natalia Hortas, Reych Madone y Yamila Palacios.
Coa intención de ir conxuntando á formación, o Farto protagonizou durante a fin de semana unha concentración de pretempada na que participaron ciclistas profesionais como Delio Fernández, Gustavo Veloso ou Álex Marque ofrecendo charlas técnicas. Ademais os preparadores do equipo aproveitaron para realizar os axustes necesarios nas bicicletas que lucirán esta tempada en función dos estudos biomecánicos.
Relacionadas:
-
Quilómetros de experiencia para o Aleata-Farto na estrea da Copa de España en Eibar
Por Redacción |
-
O Farto estrea tempada en Valencia
Por Redacción |
-
A familia do Club Ciclista Farto segue a medrar
Por Redacción |
-
O ciclismo feminino reclama o seu espazo na cidade cun ambicioso proxecto do Farto
Por Diego Espiño |