Sonia Pariente e Luismi Velásquez, vencedores en Portonovo no III Tríatlon Boamorte
Por Redacción
Luismi Velásquez defendeu este domingo con éxito o seu triunfo o pasado ano no Tríatlon Boamorte, disputado en Portonovo e que coroou a Sonia Pariente na carreira feminina.
Preto de 250 deportistas tomaron a saída á primeira hora da mañá desde a praia de Baltar, para afrontar un percorrido en distancia olímpica (1.500 metros de natación, 40 quilómetros de ciclismo e 10 quilómetros de carreira a pé) coa peculiaridade de que estaba prohibido circular a roda no sector ciclista.
Na categoría masculina a loita foi pechada na cabeza, impoñéndose ao final Velásquez cun tempo de 1:52:32 e por só 5 segundos sobre Diego Paz, mentres que Cristóbal Dios foi terceiro (1:53:51).
Máis claro foi o triunfo de Sonia Pariente (2:12:58), xa que a deportista do Tríatlon Rías Baixas avantaxou en pouco máis de 4 minutos á súa compañeira de equipo Aída García (2:17:00), mentres que a defensora da coroa do Boamorte, María Jesús Coya, foi terceira (2:18:45).
Consulta as clasificacións completas do III Tríatlon Boamorte.