Recital de Romay, autor de catro goles no triunfo granate sobre o Juvenil de Ponteareas (1-6)
Por Redacción
Terceiro partido dos granates en catro días e nova vitoria, nesta ocasión fronte a un rival de categoría inferior como o Juvenil de Ponteareas, que pouca resistencia puido opoñer, a pesar de que Luismi, como é lóxico, recorreu a distribuír minutos entre os seus xogadores, a fin de non correr riscos nin sobrecargar de traballo aos que menos de 24 horas antes derrotaran en Pasarón ao Deportivo Fabril.
Esa foi a razón de que o técnico granate optase por un once inicial no que había maioría de xogadores que disputaron menos tempo o día anterior, optando por aliñar de saída a Rubén; Juan, Campillo, David Castro, Nacho Lorenzo; Berrocal, Jesús, Romay; Antón, Rivera e Pibe, para dar entrada ao longo do segundo tempo ao porteiro Diego, ademais de Víctor Vázquez, Kevin Presa, Álex Fernández, Javi Pazos, Javi López, Adrián León, Iñaki e Nacho López.
A superioridade granate foi total desde o asubío inicial. Non se chegara aínda ao minuto cinco de partido cando Romay, que sería o gran protagonista ao conseguir nada menos que catro goles, abría a conta.
Berrocal ampliaba distancias e o mesmo Romay encargábase de subir o 0-3 ao marcador para entrar nuns minutos vibrantes. Por si fóra pouco, as esperanzas locais terminaban nas mans de Rubén, que detiña un penalti, para que acto seguido Romay lograse o cuarto gol granate e terceiro na súa conta.
Pero non terminaría aí o "recital" Romay, que xusto antes do descanso lograba o seu "poker" particular co 0-5, para pechar un primeiro tempo no que os de Luismi mostráronse intratables, aproveitando as boas condicións e amplas medidas dun bo escenario como é o de Pardellas.
A diferenza no marcador, os cambios realizados e o cansazo acumulado nas pernas fixeron que o Pontevedra baixase o ritmo e vísese unha segunda parte máis discreta e con certa igualdade de forzas.
Sen grandes sobresaltos nas áreas, cando o partido encaraba a súa recta final o equipo que adestra o pontevedrés Óscar Guimeráns conseguía unha pequena satisfacción co gol da honra, por medio de Julián, pero sen ter tempo para saborealo, xa que o Pontevedra respondía apenas un minuto despois co 1-6 definitivo, obra de Javi Pazos.
Destacar o bonito xesto do anfitrión Juvenil de Ponteareas, que obsequiou ao Pontevedra CF, a Kevin Presa e a Edu Sousa, antes de comezar o partido, con senllas placas conmemorativas ao club granate e de homenaxe aos xogadores con raíces ponteareás.
Relacionadas:
-
O Pontevedra vence en Betanzos e mantén a súa imbatibilidade na pretempada
Por Redacción |
-
Arruabarrena, a menor ritmo no seu primeiro día como granate
Por Diego Espiño |
-
O Pontevedra aparca o céspede artificial no tramo final da pretempada
Por Redacción |
-
Mikel Arruabarrena é o dianteiro elixido polo Pontevedra para pechar o seu plantel
Por Diego Espiño |
-
Vitoria pola mínima do Pontevedra ante o Fabril nun amigable sen pena nin gloria
Por Diego Espiño & Paula Sanmartín |
-
Romay ve neste Pontevedra "un equipo para ser ambiciosos"
Por Diego Espiño |
-
Empate sen goles para o Pontevedra ante o Arenteiro de Terceira División
Por Redacción |
-
Contundente e convincente triunfo do Pontevedra sobre o Compostela (0-3)
Por Ramiro Espiño |