O Arosa presenta a Carlos Torrado e Javi Nogueira mentres Rafa Saéz espera por un dianteiro
Por Ramiro Espiño
Segue o Arosa construíndo un plantel que lle permita aspirar a todo na Terceira División. Os últimos en chegar son Carlos Torrado e Javi Nogueira, cos que Rafa Sáez conta xa con 17 xogadores nun equipo que terá 21 efectivos e no que o técnico da Seca admitiu esperar por un dianteiro centro de nivel, dentro das posibilidades económicas do club arlequinado.
Xunto co canteirán Torrado, destaca a incorporación de Javi Nogueira, procedente do Alertanavia, co que conseguiu 15 goles a tempada pasada. Ambos foron utilizados polo club como modelos para a presentación dos dous equipamentos oficiais do equipo para a tempada 2018/19.
Aos 17 xogadores xa confirmados uniranse tres dos cinco homes que seguen a proba, os canteiráns Guille, Javi Acuña, Jorge, Sayar e Trapero, que co ansiado dianteiro centro completarán a cifra de 21 compoñentes do primeiro equipo.