O Pontevedra, nun grupo de Segunda B con Galicia, Castela e León, Madrid e Canarias
Por Alejandro Espiño
O Pontevedra CF xa coñece aos seus rivais para a tempada 2018-2019. A asemblea de clubs de Segunda B aprobou este mércores a proposta de configuración dos catro grupos de competición.
Os granates volverán formar parte do grupo I da Segunda B, onde apenas haberá cambios. Nel, estarán integrados os cinco equipos galegos, os sete madrileños, sete dos oito casteláns-leoneses (queda fóra o Mirandés) e un equipo canario.
Os equipos que formarán o grupo I son:
Galicia (5): Pontevedra, Celta B, Coruxo, Fabril e Rápido de Bouzas.
Madrid (7): Atleti B, Fuenlabrada, Navalcarnero, Castilla, Adarve, San Sebastián de los Reyes e Internacional.
Castela e León (7): Burgos, Salmantino, Unionistas, Guijuelo, Ponferradina, Valladolid B e Cultural Leonesa.
Canarias (1): Las Palmas B.
Pola súa banda, o grupo II estará formado por País Vasco, Navarra, A Rioxa, Cantabria, Asturias e o Mirandés; o III por Cataluña, Valencia, Baleares, Aragón e o Conquense; e o IV por Andalucía, Murcia, Estremadura, Melilla e o Talavera.
Esta era a proposta presentada polos equipos navarros, que rexeitaban –tal e como se solicitaba desde Galicia- que os galegos volvesen xogar cos clubs de Asturias, Cantabria e o País Vasco. Esta foi, segundo diversas fontes, a segunda opción máis votada.
Esta proposta deberá ser agora ratificada pola asemblea xeral da Federación Española de Fútbol que se celebrará o próximo 24 de xullo.