A carreira Ponle Freno Pontevedra aspira a converterse nun evento de masas na súa segunda edición
Por Diego Espiño
Pontevedra repetirá experiencia dentro do circuíto de carreiras Ponle Freno, iniciativa do grupo Atresmedia en favor da seguridade viaria.
A Boa Vila acollerá por segundo ano una destas probas, que se disputará o sábado 30 de xuño herdando do mesmo xeito que hai un ano o formato da PonteNoite 5+5.
"Hemos elegido Pontevedra porque creemos que es una ciudad espléndida fruto de un ejemplo de seguridad vial", explicou na presentación do evento Álvaro Pito antes de sinalar que a recadación que logren será destinada integramente a unha campaña de Stop Accidentes no municipio, en concreto a un proxecto piloto nunha contorna escolar do rural.
O obxectivo a nivel de participación pasa por superar amplamente o milleiro de corredores de 2017 para converter a carreira en todo un evento de masas.
A proba comezará ás 20:30 horas con carreiras infantís, mentres que ás 21:30 horas darase a saída á categoría absoluta desde a Avenida Montero Ríos, cun formato que permitirá completar unha ou dúas voltas ao percorrido deseñado (5 ou 10 quilómetros).
A inscrición terá un custo de 5 euros e ademais habilitouse unha fila 0 para realizar doazóns sen necesidade de ter que calzar as zapatillas de deporte.