24 equipos disputan a fase previa do 15º Torneo Internacional de Fútbol 7 Benxamín "Cidade de Pontevedra"
Por Ramiro Espiño
Un total de 24 equipos disputarán durante todo o mércores, día 1 de maio, dende as 10:00 horas ata as 20:00 horas, no campo 2 do Sintético da Xunqueira, a Fase previa do 15º Torneo Internacional de Fútbol 7 Benxamín "Cidade de Pontevedra", que ano tras ano vén organizando con notable éxito de público e participación a Escola de Fútbol Porteiro 2000, que preside Manolo Sánchez.
A organización dividiu os 24 clubs participantes en 6 grupos, distribuídos da seguinte forma: Grupo A: A.D. Sagrado, E.D. Val Miñor, Louro Tameiga e E.D. Poio. Grupo B: Rápido de Bouzas, Marcón Atlético, A.D. Playa de Cobas (Viveiro) e S.C.D. Salcedo. Grupo C: Santa María del Mar (A Coruña), A.C.D. A Seca, Pabellón C.F. e A.X.D. Verdugo. Grupo D: Alondras, C.F., E.F. Lalín, C.D. Choco e Arosa S.C. Grupo E: Victoria C.F. (A Coruña), Coruxo F.C., A.J. Lérez e Figueirido C.F. Grupo F: Montañeros C.F. (A Coruña), Xuventude Oroso, Pontevedra C.F. e Ponte Ourense.
Clasificaranse para a Fase Final oito destes 24 equipos. Farano directamente os 6 campións de grupo, ademais de 2 equipos resultantes das eliminatorias a disputar entre todos os segundos clasificados dos grupos e os 2 mellores terceiros.
Nesa fase final, cuxo cartel está aínda por pechar, pódese confirmar xa a presenza de clásicos nesta cita como F.C. Barcelona, F.C. Porto, Benfica, Atlético de Madrid, Celta e Deportivo.