Primeira oportunidade para o Teucro de asegurar a súa participación no play-off
Por Diego Espiño
Teucro e Bidasoa buscan no Pavillón Municipal dos Deportes (Sábado 20:00 horas) asegurarse a súa presenza no play-off de ascenso á Liga Asobal, que se disputará o 11 e 12 de maio.
Os azuis, despois de catro encontros consecutivos gañando, poderían clasificarse para a fase de ascenso se vencen un rival directo como o Bidasoa e o Torrelavega non gaña o seu partido ante o Calmec Barakaldo. O horario deste último encontro (18:30 horas) fará que o Teucro salte á pista coñecedor de se conta con opcións reais de asegurarse o play-off a dúas xornadas da conclusión da liga regular ou se terá que esperar unha semana máis.
Non o terá doado o conxunto que dirixe Javier Barrios a pesar de estar no mellor momento do ano. Enfronte estará un rival que suma os seus últimos cinco encontros en liga por triunfos pero ao que os teucristas xa venceron na primeira volta (26-30).
Barrios, sen contar co lesionado César Armán, terá á súa disposición a todo o plantel, mentres o equipo vasco chega a Pontevedra coa ausencia de Alexis Gimeno por culpa dun pinzamento lumbar.
Nesta xornada, ademais da composición da fase de ascenso, podería quedar decidida tamén a praza de ascenso directo ao enfrontarse segundo e terceiro clasificado, Juanfersa Gijón e Ángel Ximénez. Unha vitoria dos asturianos supoñería o salto de categoría ao non poder ascender o líder da competición, o filial do Fútbol Club Barcelona.