200 entradas de Fondo Sur para os afeccionados do Compostela
Por Diego Espiño
A rebaixa nos prezos para o partido do próximo domingo (17:00 horas) entre Pontevedra e Compostela, con entradas a 2, 4 e 6 euros, provocou o interés de centos de afeccionados do equipo santiagués.
A entidade granate acordou facilitar 200 entradas ao Compostela accedendo ademais á petición feita polas peñas branquiazuis de situalos a todos no mesmo lugar de Pasarón. Por iso, os afeccionados santiagueses situaranse na parte superior do Fondo Sur.
Dende o próximo rival do Pontevedra comezouse ademais unha campaña para mobilizar os seus seguidores e que se despracen así ata a cidade de Lérez nun encontro considerado como vital para os dous equipos.
Con ese obxectivo dende a directiva compostelá púxose en marcha un concurso en Facebook no que regalan 20 entradas para o choque, ao que hai que sumar unha carta aberta do presidente da entidade, Antonio Quinteiro, pedindo o apoio e implicación da súa masa social. Ademais, dende o club santiagués formulouse a posibilidade de fretar autobuses, que serán gratuítos para os aboados e custarán 5 euros para os non socios, sen entrar aquí algunha das peñas do equipo que xa confirmaron que viaxarán pola súa propia conta ata Pontevedra.
VENDA DE ENTRADAS NA PRAZA DA PEREGRINA
Dende o xoves e ata o mesmo día do partido, o domingo, o Pontevedra montará un posto na Praza da Peregrina onde se poderán adquirir de xeito anticipado entradas para o choque, no que se renderá homenaxe ao equipo que conseguiu o primeiro ascenso a Primeira División na historia granate no día que se cumpren 50 anos daquela xesta.
O horario da carpa será de 12:00 a 20:00 horas xoves e venres e de 11:30 a 14:00 horas o sábado e o domingo. Polo posto pasarán algúns dos xogadores de aquel equipo como Ceresuela, Cholo, Tito Estévez, José Jorge e Calleja.