50 anos do primeiro ascenso a 1ª División meréceno: prezos populares de 2,4 e 6 euros para o Pontevedra-Compostela
Por Diego Espiño
Aquel 14 de abril de 1963 o Pontevedra logrou unha das maiores xestas da súa historia. Cun equipo modesto e baixo presuposto, pero con grande ilusión e unha cidade envorcada, os granates lograban ante o Celta de Vigo o seu primeiro ascenso a 1ª División. Era o día do famoso "gol do allo" de Ceresuela, o que supuxo o empate a un que necesitaban para dar o salto de categoría.
Pasaron case 50 anos, cúmprense o domingo, cun partido vital para as aspiracións actuais do club nunha situación radicalmente oposta. Visita Pasarón o Compostela, terceiro clasificado en Terceira División con catro puntos de vantaxe sobre os granates. Esa coincidencia, segundo o xornalista Xabier Fortes, é algo que non se podía deixar pasar, "será una buena tarde de fútbol para que se reencuentre toda la familia granate. Me gustaría que no quedase una butaca vacía".
Fortes compareceu ante os medios nunha convocatoria na que tamén se encontraban dous dos protagonistas daquel equipo, Rafael Ceresuela e o eterno capitán, Cholo, que ascendeu co Pontevedra dende Preferente ata a 1ª División, ademais do ex-presidente Miguel Domínguez Vaz, fillo do presidente do ascenso, e o actual xestor do club Mauricio Rodríguez.
As entradas do Pontevedra-Compostela serán de 2 euros nos fondos, 4 en Preferencia e 6 en Tribuna
Todos eles presentaron os actos de homenaxe ao equipo da tempada 62/63, a cuxos integrantes se lles fará o corredor de honra ante o Compostela seguido dun saque conmemorativo que realizará o autor do "gol do allo", Ceresuela, quen empurrará o balón á rede da portaría do Fondo Norte, a mesma na que marcou naquela tarde de 1963.
Para intentar que Pasarón rexistre un grande aspecto o Pontevedra decidiu rebaixar os prezos, que serán de 2 euros para os fondos, 4 para Preferencia e 6 para Tribuna. Ademais repartiranse preto de 2.000 entradas nos colexios da cidade e instalarase, dende o mércores, unha carpa na Praza da Peregrina onde se realizará a venda anticipada dos billetes.
Miguel Domínguez e Xabier Fortes preparan un libro para o 75 aniversario da entidade
O autor do libro sobre os primeiros 50 anos de historia do Pontevedra Club de Fútbol, Miguel Domínguez Vaz, anunciou xunto a Xabier Fortes a intención de ambos os dous de realizar un novo traballo que recolla os últimos 25 anos da entidade granate para que estea listo no 75 aniversario, previsto para o 2016.