Pontevedra, berce de medallistas mundiais
Por Diego Espiño & Mónica Patxot
Doce medallas acumula Óscar Graña ao longo da súa extensa carreira deportiva en campionatos do Mundo de piragüismo maratón. A última a conseguida este mesmo mes de setembro en Sudáfrica, cunha prata.
Que dicir do palmarés de Javi Gómez Noya, recente campión do Mundo de tríatlon en distancia Ironman 70.3 e subcampión das Series Mundiais da ITU.
Ambos os dous son uns dos máximos expoñentes do deporte pontevedrés, e por iso encabezaron a merecida homenaxe que o Concello de Pontevedra brindou este martes aos deportistas que ao longo de 2017 lograron subir ao podio nun campionato do Mundo.
"Creo que Pontevedra é unha cidade modelo en moitas cousas, e non deporte tamén", sinalou na súa breve intervención Gómez Noya, todo un mito no seu deporte.
"É un orgullo", recoñeceu á súa vez o alcalde de Pontevedra, Miguel Anxo Fernández Lores, poder contar na cidade con deportistas deste calibre, pero tamén "cos que están empezando, o que demostra que hai canteira", declarou en relación ás outras tres homenaxeadas.
Porque no Pazo de Mugartegui, lugar escollido para o acto, tamén estaban por méritos propios novos nomes do deporte pontevedrés e nacional, promesas que aos poucos e con moito esforzo vanse convertendo en realidade como Águeda Cons, dobre medallista no mundial junior de natación celebrado en Indianápolis (EEUU), con dous bronces.
A recepción tamén foi para dous mozos piragüistas da EP Ciudad de Pontevedra, Carolina García e Antía Jácome, subcampioas do Mundo junior no campionato celebrado en xullo en Romanía, participando no K-4 500 e o C-2 200 metros respectivamente e que non puideron acudir ao atoparse concentradas en Sevilla, centro de alto rendemento para o piragüismo nacional. No seu lugar recolleu as distincións o seu adestrador Miguel Ángel Villanueva, 'Miki'.