Segue adiante o Pontevedra na Copa Deputación ao vencer (1-6) ao Cesantes nun lamazal
Por Ramiro Espiño
Non houbo lugar para a sorpresa. O Pontevedra afrontaba a segunda eliminatoria da Copa Deputación de novo nun campo de terra e fronte a un rival da terceira categoría autonómica e a diferenza fíxose notar. Aínda coa presenza de xogadores xuvenís no once titular para suplir a praga de baixas que asola ao equipo granate, os de Milo Abelleira sentenciaron na primeira parte, limitándose a pechar o trámite sen arriscar na segunda, nin se asañar coa debilidade do rival.
O partido non tivo historia. Para os granates a nota positiva púxoa Santi Domínguez. O dianteiro que leva sen xogar varias semanas por lesión, chegou con febre ao campo, pero aínda así quixo probar o seu estado de forma de cara á súa posible volta ao campo o domingo, fronte ao Ordes. Milo deulle 45 minutos e neles Santi reencontrouse co gol e mandou ao fondo da portaría case cada balón que tocou.
Catro goles de Santi Domínguez e un de Stefan certificaban a superioridade granate no primeiro tempo, ante un Cesantes desbordado que apenas lograba pasar do centro do campo, e para maior mérito pontevedrés nun lamazal con zonas absolutamente impracticables, o que dá máis mérito non xa á vitoria, que se supón lóxica, senón á actitude de todos os que saltaron ao campo.
Precisamente as condicións do terreo e o amplo do resultado fixeron que a segunda parte se xogase con máis pausa, evitando riscos innecesarios, a pesar do cal o Pontevedra dispuxo de numerosas ocasións para ampliar aínda máis o marcador.
En definitiva, cumpriuse o expediente. Volveu ao grande Santi Domínguez, que pode ser a novidade fronte ao Ordes. Recuperouse Javi Pazos, aínda que Milo preferiu reservalo, mentres que o resto de lesionados, Sestelo, Caco, Fran Fandiño, Iago Paz e Richi teñen complicado recuperarse a tempo, aos que pode unirse Moisés, que segue acusando o forte golpe recibido nas costas no partido de Carballo e que de momento o converte en seria dúbida.
C.D. CESANTES (1): Víctor (José, minuto 46); Juan (Juancar, minuto 38), Xaime, Rafa, César (Iván Reboreda, minuto 51); Cadilla, Manu; Lubis (Canario, minuto 46), Miñán, Roi (Sony, minuto 67); e Claudio.
PONTEVEDRA, C.F. (6): Lorenzo; Adrián, Bruno, Marou (Pablo, minuto 46), Nano; Cristóbal Juncal (Tubo, minuto 46), Emilio, Tomás (David Pérez, minuto 46), Portu; Santi Domínguez (Jacobo, minuto 46) e Stefan.
Árbitro: Miñán Fernández (Pontevedra). Amoestou a Xaime.
Goles: (0-1) Minuto 12: Santi Domínguez. (0-2) Minuto 28: Stefan. (0-3) Minuto 35: Santi Domínguez. (0-4) Minuto 38: Santi Domínguez. (0-5) Minuto 43: Santi Domínguez. (1-5) Minuto 59: Roi. (1-6) Minuto 65: Nano.
Incidencias: Campo de A Gándara (O Viso-Redondela). Boa entrada cuns 250 espectadores.