Primeira xornada do Campionato de España de Tríatlon por Clubs

O Campionato de España de Longa Distancia, aposta de Pontevedra para o tríatlon en 2018

Por Diego Espiño
Martes 20 de Xuño, 2017 ás 07:00 do Martes 20 de Xuño, 2017

Pontevedra non fallará o próximo ano 2018 á súa cita co tríatlon de alto nivel, aínda que o fará cunha novidade, apostando pola longa distancia.

Así se acordou coa Federación Española de Tríatlon tras a disputa do recente Nacional por Clubs na cidade, outorgando á capital provincial a organización do Campionato de España de Longa Distancia do próximo ano.

A intención do Concello de Pontevedra e dos responsables federativos é desta maneira poder testar o circuíto que se empregará no Mundial da especialidade que se celebrará en 2019 en Pontevedra dentro do ITU Multisport Festival, xunto aos campionatos do Mundo de tríatlon cros, dúatlon, aquatlón e aquabike.

Federación e responsables técnicos do Servizo Municipal de Deportes deben fixar en próximas datas a fin de semana concreta na que se celebrará o evento para empezar a deseñar o seu percorrido, que leva unha maior complexidade ao tratarse de grandes distancias, principalmente no caso do sector ciclista.

O Campionato de España de Longa Distancia consta de 4 quilómetros de natación, 120 quilómetros de ciclismo e un sector final de 30 quilómetros de carreira a pé, e atraerá á cidade a un importante número de deportistas xa que se disputará nas categorías elite, sub-23, grupos de idade e paratríatlon, tanto masculinas como femininas.