Hoteleiros e Concello pactan ofertas para os clubs que se aloxen na cidade nos diversos campionatos
Por Redacción
O hoteleiros de Pontevedra e o Concello pretenden rematar co costume dalgúns clubs que participan en eventos deportivos na cidade de aloxarse en poboacións próximas. Para iso os profesionais do sector, representados polos hoteis Galicia Palace, Rías Baixas, Rúas, Virxe do Camiño, Peregrino, Parador e Room pactaron diversas ofertas de cara aos deportistas que acudan á citas deportivas.
Só nas probas de piragüismo que se celebrarán no encoro do Pontillón do Castro, como a Copa de España de 1.000 metros, o Campionato de España de Pista e o Campionato de España de Novas Promesas, se espera a presenza de preto de 1.600 deportistas.
Para facilitar a súa estanza, os responsables municipais estudan habilitar un recinto vixiado as 24 horas para que os equipos poidan deixar as súas piragüas, un servizo que só estaría dispoñible para os club que pasen a noite na cidade.
Ademais das competicións de piragüismo, Pontevedra será sede en 2013 do Campionato de España de Dúatlon, de Tiro con Arco Tradicional, de Natación Sincronizada infantil ou do Campionato de España de Natación tamén infantil, ao que hai que sumar o paso da Vuelta Ciclista a España no mes de agosto.