A falta de acerto no remate condena a un Pontevedra que empata (1-1) fronte ao Barbadás despois de estrelar tres disparos na madeira
Por Ramiro Espiño & Diego Torrado
O fútbol ten máximas que adoitan cumprirse con máis precisión que a matemática. Unha delas, a que di que o que perdoa acaba pagando, sufriuna onte un Pontevedra que fixo méritos máis que sobrados non só para gañar, senón mesmo para golear ao Barbadás e non obstante tivo que conformarse cun empate encaixado na única chegada con perigo que foi capaz de xerar o cadro visitante en todo o partido.
Cun once condicionado polas numerosas baixas nas súas filas, os xogadores granates volveron demostrar que agora mesmo están moi por enriba en canto a actitude e ganas que o propio club que lles maltrata semana a semana. Nada que reprochar en canto a loita e entrega, só lamentar a falta de acerto no remate final que custou deixar pasar a posibilidade de reducir diferenzas co Compostela, directo rival para acceder ás prazas de privilexio.
O aspecto das practicamente desertas bancadas de Pasarón é un perigoso sinal da decadencia dun club histórico, case tanto como da inadmisible indiferenza dos seus dirixentes?, que asisten sen inmutarse a unha desertización da bancada, absolutamente impensable non hai demasiado tempo.
Monopolizando o balón e as chegadas á área, o Pontevedra encerrou o Barbadás na súa área. O primeiro aviso chegaría pronto, cando Moisés mandaba alto un remate dende a frontal. A continuación o penalti, protestado polos visitantes, ao estimar que non houbo mans de Viéitez ao interceptar o disparo do mesmo Moisés. Jacobo adiantaba o Pontevedra con seguridade e o propio Jacobo sería o protagonista minutos despois da xogada máis espectacular do partido, cando engancha unha volea tremenda dende fóra da área que se estrela na mesma cruceta.
Comezaba o recital de ocasións falladas. A seguinte sería para Stefan, que coa punteira non logra salvar a saída á desesperada de Berto, que salva co pé. Logo viría Moisés, nun lanzamento de falta que remata na parte superior da travesa. E a sombra da dúbida comezou a planear sobre Pasarón.
O Pontevedra estaba a perdoar un rival á súa mercede, no que só as brusquidades de Nacho Currás merecían algún comentario e non precisamente favorable para o veterano xogador, que remataría xustamente expulsado, pero que debeu tomar en camiño do vestiario xa na primeira parte.
Richi abandonou o campo lesionado tras unha dura entrada de Oli permitindo o debut de Pibe
Antes do descanso aínda habería unha nova oportunidade clara, ademais da lesión de Richi, nunha fortísima entrada de Oli, que permitiría o debut do mozo Pibe. Precisamente este habilita un pase interior para Stefan, pero o centro cabecéao Moisés, a pracer, desviado.
Na reanudación vimos a un Barbadás disposto a frear como fose ao Pontevedra, e conseguiuno co chamado "outro" fútbol, no que Nacho Currás viu como o árbitro lle perdoaba unha clara segunda amarela por unha patada aleivosa e intimidatoria sobre Pibe.
Os granates que intentaban pechar o partido cun segundo gol agora tiñan dificultades para facer perigo e na única contra que permitiu o equipo, o Barbadás lograba o empate. Cumprírase a máxima antes aludida.
Coa expulsión de Nacho Currás, máis, que merecida por outra acción tan violenta como innecesaria, o partido se converte nun monólogo granate. Stefan, de cabeza, vólvese encontrar coa madeira, estrelando o balón no poste. Terceiro remate dos pontevedreses á madeira. Aínda habería tempo para unha última ocasión, co Barbadás practicamente colgado do longueiro defendendo o empate, o mesmo Stefan remata de cabeza, parando Berto sobre a mesma liña de gol. Inxusto, pero fútbol, á fin e ao cabo.
Menos de 600 espectadores nas bancadas na peor entrada da tempada e da historia recente nun partido de liga
PONTEVEDRA, C.F. (1): Lloves (1); Cristóbal Juncal (1), Yago Vázquez (2), Pablo (2), Adrián (2); Iago Paz (2), Moisés (2); Richi (1), Jacobo (2), David Pérez (1); e Stefan (2).
Substitucións: Pibe (1) por Richi, minuto 39. Javi Pazos (1) por Iago Paz, minuto 73.
U.D. BARBADÁS (1): Berto (2); Jorge (1), Viéitez (1), Martín Fernández (1), Oli (1); Nacho Currás (0), Luis (1); Nuno (1), Cristian (1), Prada (1); e Rafita (2).
Substitucións: Fran (2) por Nuno, minuto 57. Alfredo (1) por Prada, minuto 62. Javi Ramos (s.c.) por Rafita, minuto 84.
Árbitro: Pérez Prado (Lugo), auxilliado nas bandas por Colla Gómez e Vázquez Valín. Expulsou por dobre amoestación a Nacho Currás, no minuto 73. Amoestou a Cristóbal Juncal, Adrián, Iago Paz, Javi Pazos, Pibe, Jorge, Viéitez e Alfredo.
Goles: (1-0) Minuto 15: Penalti por mans de Viéitez ao interceptar un disparo de Moisés. Jacobo transforma enganando a Berto. (1-1) Minuto 68. Pase de Rafita ao espazo libre que aproveita Fran para nunha rápida transición plantarse ante Lloves e batelo por raso.
Incidencias: Estadio Municipal de Pasarón (Pontevedra). A peor entrada da tempada, con apenas 600 espectadores.
VESTIARIOS:
Jorge Regal: "Perdoáronnos a vida, pero teño que aclarar que o penalti non o foi"
JORGE REGAL: Non tivo reparo o técnico visitante á hora de recoñecer que o Pontevedra lles perdoara: "A primeira parte foi total e absolutamente do Pontevedra. Tiveron moitas ocasións e perdoáronnos a vida, pero teño que aclarar que non obstante o penalti non o foi. Eu non podo velo, pero o que me din é que lle dá na man a un xogador do Pontevedra, non ao noso. Logo, na segunda en xogo nivelouse, ata que a expulsión de Nacho Currás rematou o partido. Foi xusta, si, pero impediunos intentar algo máis que o empate".
Con respecto ao seu primeiro partido en Pasarón, o adestrador ourensán dixo: "Para nós é un premio vir a xogar a un campo así. Somos un equipo modesto, pero a nivel de grupo humano o meu equipo é o mellor da categoría".
Milo Abelleira: "Ao fallar tanto pagámolo con este empate que é inxusto"
MILO ABELLEIRA: Tampouco lle parecíó penalti a Milo o que sinalaron a favor do seu equipo, se ben pensaba que esa decisión rematou prexudicándolles logo no criterio arbitral: "Fixemos dos partidos máis completos na casa, pero escapóusenos a vitoria polos nosos fallos de cara ao gol. Creo que non foi penalti, porque o balón lle dá na cara a Stefan, pero esa decisión pagámola logo noutras cousas. Tomamos riscos para estar en campo contrario e intentar sentenciar e pilláronnos nunha contra facendo o empate, pero insisto que ao fallar tanto o pagamos con este empate que é inxusto evidentemente".
Con respecto a se o tropezo minguaba as posibilidades de alcanzar o play-off, Milo dixo: "Temos que xogar aínda con Depor e Compos e debemos pensar que podemos gañarlles. Con este resultado complícasenos un pouco, pero seguimos con opcións".